Agam 03 Ang 03 Sthanang Sutra Mool Sthanakvasi

Author(s): Sudharmaswami, Devardhigani Kshamashaman
Publisher: Global Jain Agam Mission

Page 10

ठाणांग सुत्तं
एगपएसोगाढा पोग्गला अणंता पण्णत्ता । एगसमयठिइया पोग्गला अणंता पण्णत्ता । एगगणकालगा पोग्गला अणंता पण्णत्ता जाव एगगणलक्खा पोग्गला अणंता पण्णत्ता ।
॥ पढमं ठाणं समत्तं ॥
बीअं ठाणं
पढमो उद्देसो
जदत्थि णं लोगे तं सव्वं दुपडोयार, तं जहा- जीवच्चेव अजीवच्चेव । तसच्चेव थावरच्चेव । सजोणियच्चेव, अजोणियच्चेव । साउयच्चेव अणाउयच्चेव सइंदियच्चेव अणिंदियच्चेव । सवेयगा चेव अवेयगा चेव । सरूवी चेव अरूवी चेव । सपोग्गला चेव अपोग्गला चेव । संसारसमावण्णगा चेव असंसारसमावण्णगा चेव । सासया चेव असासया चेव । आगासे चेव णोआगासे चेव । धम्मे चेव अधम्मे चेव | बंधे चेव मोक्खे चेव । पुण्णे चेव पावे चेव । आसवे चेव संवरे चेव । वेयणा चेव णिज्जरा चेव ।
दो किरियाओ पण्णत्ताओ, तं जहा- जीवकिरिया चेव, अजीवकिरिया चेव । जीवकिरिया दुविहा पण्णत्ता, तं जहा- सम्मत्तकिरिया चेव, मिच्छत्तकिरिया चेव । अजीवकिरिया दुविहा पण्णत्ता, तं जहा- इरियावहिया चेव, संपराइया चेव । दो किरियाओ पण्णत्ताओ, तं जहा- काइया चेव, आहिगरणिया चेव । काइया किरिया दुविहा पण्णत्ता, तं जहा- अणुवरयकायकिरिया चेव, दुप्पउत्तकाय किरिया चेव । अहिगरणिया किरिया दुविहा पण्णत्ता, तं जहा- संजोयणाहिगरणिया चेव, णिव्वत्तणाहिगरणिया चेव ।
दो किरियाओ पण्णत्ताओ तं जहा- पाओसिया चेव, परियावणिया चेव | पाओसिया किरिया दुविहा पण्णत्ता, तं जहा- जीव पाओसिया चेव, अजीवपाओसिया चेव । पारियावणिया किरिया दुविहा पण्णत्ता, तं जहा- सहत्थपरियावणिया चेव, परहत्थपरियावणिया चेव ।
दो किरियाओ पण्णत्ताओ, तं जहा- पाणाइवायकिरिया चेव, अपच्चक्खाण किरिया चेव । पाणाइवायकिरिया दुविहा पण्णत्ता, तं जहा- सहत्थपाणाइवाय किरिया चेव, परहत्थपाणाइवायकिरिया चेव । अपच्चक्खाणकिरिया दुविहा पण्णत्ता, तं जहाजीवअपच्चक्खाणकिरिया चेव, अजीवअपच्चक्खाणकिरिया चेव ।