________________
नमि
चरित्रम् ।
न चेव माया, न सुया न य भायरो न सुहि बंधू । न य धणनिचया सरणं, संसारे दुक्खपउरम्मि ॥१॥ एक्को चिय इह सरणं, जम्मण-जर-मरण-दुक्खतवियाणं । सत्ताण सुहनिहाणं, जिणिंदपरिभासिओ धम्मो ॥२॥" एवं च सवं जुगवाहणा उत्तमंगविरइयकरमउलिणा पडिच्छियं । थेववेलाए सुहज्झवसाणोवगओ पंचत्तमुवगओ। तओ अर्कदिउमाढत्तो चंदजसो । मयणरेहाए चिंतियं-धिरत्थु मज्झ रूवस्स एवंविहाणत्थमूलस्स, संपइ एस पावकारी अणिच्छमाणीए वि मे अवस्स सीलभंगं करिस्सइ, ता अलं एत्थावत्थाणेण, अन्नत्थ देसे गंतूण परलोयकज्जमणुचिट्ठामि, अन्नहा पुत्तस्स वि एस पावो विणासं करिस्सइ । एवं मंतिऊग सोगाउलहिययाण चंदजसाईण अड्डरत्तसमए गुरुदुक्खसंतत्तमणा नीहरिया उज्जाणाओ गया पुवाभिमुही । पत्ता महाडइं । वोलीणा जामिणी । वच्चंतीए मज्झण्हे पावियं पउमसरं । वणफलेहिं कया पाणवित्ती। अद्धखेयखिन्ना पसुत्ता सागारं भत्तं पञ्चक्खाइत्ता कयलीहरे । आगया रयणी । तीए घुरुकंति वग्घा, गुंजंति सीहा, धुरुधुरंति वराहा, फेक्कारंति भेरवं भसुयाओ । एवं अणेगसावयसद्दवित्तत्थाए नमोकारचिंतणपराए अट्ठरत्ते जाया उयरे अईववेयणा । किच्छेण पसूया सवलक्खणसंपन्नं दारगं । पहाए य कंबलरयणेण वेढित्ता जुगबाहुनामंकियं मुद्दारयणं उलंबिऊण कंधराए गया सरवरं । पक्खालिऊण अंबराई अवइन्ना मजणत्थं । एत्थंतरे जलमज्झाओ कयंतो व समुद्धाइओ अईवजवेण जलकरी। गहिया तेण सुंडाए। पक्खित्ता नहयले । भवियधयानिओगेण दिट्ठा नंदीसरदीवपत्थिएण विज्जाहरजुवाणेणं । 'रूववई' त्ति काऊण गहिया निवडमाणी करुणं रुयमाणी। नीया वेयडपवयं। भणिओ य सो रुयमाणीए-भो महासत्त! अन्जाहं रयणीए वणमज्झे पसूया, दारगं तं च कयलीहरे मुत्तूण सरमवइन्ना, जलगएण उक्खित्ता तुमए गहिया, ता सो बालो केणइ वणयरेण वावाइजस्सइ अहवा आहारविरहिओ सयं चेव विवज्जेज्जा, ता महापुरिस! अवच्चदाणेण पसायं काऊण मा विक्खेवं करेहि, दारयमाणेहिं ममं वा तत्थ नेहि त्ति ।
