________________
चन्द्रप्रमस्वामि चरित्रम्
द्वितीयः परिच्छेदः
॥२४८॥
इन्द्रादिविहितजन्मोत्सवः।
एवमन्ने वि बासट्ठी, इंदा आणंदमंथरा । अट्ठमतित्थसामिस्स, कुणंति न्हवणं कमा ।। १३५ ॥ उच्छंगे सामिणं किच्चा, तओ ईसाणवासवो। सिंहासणंमि आसीणो, जहा सोहम्मवासवो ॥ १३६ ।। अह सोहम्मकप्पिदो, सामियाओ चउद्दिसं । चउरो फलिहुत्तंगवसहाओ विणिम्मए ।। १३७ ॥ ताण फोडियपायालनालेहिंतो व्व संतया । उन्भूया अट्ठसिंगेहि, वारिधारा नहत्थले ॥ १३८ ॥ सुरासुराण देवीहिं, दिस्समाणा सकोउयं । ताओ पडंति सामिम्मि, समुद्दे निम्मगा विव ॥ १३ ॥ जलजंतेहिं व तेहिं, निस्सरंतेण वारिणा । सोहम्मिदेण तित्थेसो, अट्ठमो ण्हविओ तओ ॥१४॥ पडतं सामिसीसाओ, ण्हवणंबु पडिच्छिय । खिवेइ मत्थए इंदो, संतत्तो कुञ्जरो विव ।।१४१॥ ते चउरो वि वसहा, उवसंहरिया खणा । इंदेण इंदजालं व, इंदजालियसामिणा ॥ १४२ ॥ एवं ण्हवित्त विच्छड्डा, सोहम्मिदो तओ पहुं । आमज्जइ सुवत्थेहिं, रयणदप्पणं विव ।। १४३ ॥ दिव्वेणमंगरागेण, चच्चिऊण जगप्पहुं । सदसेहिं सुबत्थेहिं, दिव्यपुप्फेहिं पूयए ॥ १४४ ॥ सेहरकुण्डलमुत्ताहारकेऊरकंकणा । कडिसूत्तं कडयाई, जहाहाणं निवेसए ॥ १४५ ॥ तओ आरतियं इंदो, समुत्तारेइ सामिणो । देवा खिवंति पुप्फाणि, निम्मलाणि मणाणि व ॥ १४६ ।। एवं हवित्तु पूइत्ता, अप्पाणं कयकिच्चयं । मण्णमाणो सुराहीसो, संथुणेइ जयप्पहुं ॥ १४७ ॥
जय अट्ठमतित्थेस !, जय संसारतारय ।। जय तिलोयजीवाणं, निन्निबंधणबंधव ! ॥ १४८॥
||२४८॥
