________________
श्रीधर्मरत्न
कृतज्ञताख्योगुणः
प्रकरणम्
॥९४॥
पहु ! तुह गुणधुणणेणं विसुद्धचित्ताण भवियसत्ताण । घणनीरेण व जंबूफलाई विगलंति पावाई ॥१८४॥ दसणपवणे नयणे, भालं नालं हवेइ तुह नमणे । ता पच्चक्खीभावं, लहु मह तिजईस ! वियरेसु ॥१८५॥ इय संथुओ सि देविंदविंदवंदिय! जुगाइजिणचंद ! । मह देसु निप्पकंपं, भवे भवे नियपए भत्तिं ॥१८६।। एवं जा धवलनरिंदनंदणो थुणिय पढमजिणचंदं । चंदु व्व विमललेसो, पंचंगं कुणइ पणिवायं ॥१८७॥ ता तव्वेलं पत्तो, बहुखेयरपरिगओ रयणचूडो । तं सुणिय विमलविहियं, थयं पहिट्ठो भणइ एवं ॥१८८॥ भो साहु साहु सुपुरिस !, नित्थिण्णो ते भवोयही एस । जस्सेरिसा जिणिंदे, भत्ती विप्फुरइ अकलंका ॥१८९॥ तत्तो नमित्तु देवं, परुप्परं वंदणाइयं काउं । मणिपीढियाइ बाहिं, हिट्ठा ते दोवि उवविट्ठा ॥१९॥ अह पुच्छिय तणुकुसलं, खयरिंदो भणइ भो महाभाग ! । जं मह कालविलंबो, जाओ हेउं सुणसु तत्थ ॥१९१॥ तइया तुम्ह सयासा, पत्तो सपुरम्मि पणमिया पियरो । अभिनंदिओ य तेहि, हरिसंसुयपुण्णनयणेहिं ॥१९२॥ अक्कंते तम्मि दिणे, मह सयणगयस्स सरियजिणगुरुणो । निदाऽऽगया निसाए, य दवओ भावओ न उण ॥१९३।। भो भुवणेसरभत्तय !, उद्वसु एवं सुणंतओ वयणं । बुद्धो निएमि पुरओ, रोहिणिपमुहाउ विज्जाओ ॥१९॥ तुह धीर ! धम्मथिरभावरंजिया पुण्णपेरिया अम्हे । सिद्धाउ त्ति भणित्ता, मह अंगे अणुपविट्ठाओ ॥१९५।। तो सयलखेयरेहिं, विहिओ मे खयरचक्किअभिसेओ । वोलीणा केवि दिणा, नवरज्जं संठवंतस्स ॥१९६॥ सुमरिय तुह आएसं, परिभमिओ भूरिमंडलेसु अहं । दिट्ठो एगत्थ मए, बुहसूरी भूरिसीसजुओ ॥१९७।।
तत्र विमलकुमारकथा। ॥९४॥
Jain Education
For Private Personel Use Only
www.jainelibrary.org
