Prabuddha Jivan 2017 11

SR No.: 526112
Original Sutra Author: N/A
Author: Sejal Shah
Publisher: Mumbai Jain Yuvak Sangh
Publication Year: 2017
Total Pages: 60
Language: Gujarati
Classification: Magazine, India_Prabuddha Jivan, & India
File Size: 3 MB

Page 7

સમગ્ર અસ્તિત્વના ધ્વસ માટે હવે તૈયાર રહેવું પડશે. અસ્તિત્વ પણ મારા અહંકારનો ભાગ છે તેને વિખરાઈ જવા દો, મારા પ્રેમથી, મારી શ્રધ્ધાથી તેનો નવો ઉછેર થશે. સંકુચિત કરવું અને વિસ્તાર કરવો, પણ આ બન્નેનો ભેદ ખબર હોવો જોઈએ, આટલાંવર્ષોના સ્મરણો, ઢાંચાઓ, સલામતીની વ્યવસ્થાઓ, અનુકુળ વર્તુળો, કહેવાતા ભ્રમો વગેરેથી મુક્ત થવું, સાંભળવામાં જેટલું સરળ છે એટલું કરવું અધરું છે- હું જાણું છું આ અધરું કાર્ય છે અને હું એમાં પાર નથી પડતી, એટલે અજંપો મને જંપવા નથી દેતો, આ પ્રવાસ અત્યંત અધરો છે, હિમાલય પર જેમ જેમ ઉપર ચઢતા જઈએ, તેમ તેમ ચઢાણ અધરું બનતું જાય અને ત્યારે બે જ વિચાર આવે કે પાછી વળી જાઊં કે પછી બીજીવાર નહીં જ આવું. પણ ત્યાં પહોંચ્યા પછી બધી જ પીડા સાવ ઓગળી જાય અને જે પ્રાપ્તિનો આનંદ હોય તેમાં મન મસ્ત બની જાય અને બધું જ ભૂલી જવાય છે. પણ મોટે ભાગે થતું હોય તેમ, અહીંથી ઝડપથી નીચે ઉતરી જવાનું નથી, એ સ્થિતિ જાળવી રાખવી છે. ઉપલબ્ધિને કાયમી બનાવવાની છે, ટકાવી રાખવું અને તાકી રહેવું, એ પણ પડકાર છે. એક દિવસનો ઉપવાસ સરળ છે પણ રોજનો ચોવિયાર અધરો લાગે છે કે પછી કોઈ પણ રોજીંદો નિયમ અધરો લાગે, તેમ જ આ ટકી રહેવાની પરિસ્થિતિ અધરી છે પણ એને જ નિત્ય અવસ્થા સમજી કે એ જ નિત્ય અવસ્થા સ્વીકારી લેવાય, પછી આ આત્માના મિલન સામે કોઈ અવરોધ રહેતા નથી. એ રુહાની આનંદમાં મગ્ન થઇ જવાય.
आश्चर्यवत पश्यति कश्चित् एनम आश्चर्यवत वदति तथैव चान्यः आश्चर्यवतच एनम अन्यः श्रुणोति श्रुत्वा अपि एनम न चैव कश्चित्
- ભગવદ ગીતા અધ્યાય ૨ શ્લોક ૨૯ કોઈ વિરલ મહાપુરુષ જ આ આત્માને આશ્ચર્યની જેમ જુએ છે તેમ જ બીજો કોઈ મહાપુરુષ જ આત્મતત્વને આશ્ચર્યની જેમ વર્ણવે છે તથા બીજો કોઈ અધિકારી પુરુષ જ આને આશ્ચર્યની પેઠે સાંભળે છે કોઈ તો સાંભળીને પણ આને જાણતો નથી. આથી વધુ શું પ્રમાણ હોઈ શકે કે તમામ ધર્મ, તમામ ફિલસુફી એક જ વાત કહે છે!
પ્રવાસ આરંભાઈ ગયો છે ક્યારનીયે રાહ જોવાઈ રહી છે યોગ્ય અંતરતમ્ પ્રબુદ્ધ પ્રવાસીજનો ચાલો.........
0 સેજલ શાહ sejalshah702@gmail.com Mobile : +91 9821533702
વર્ષા અડાલજાને દર્શક ફાઉન્ડેશનો
એવોર્ડ એનાયત મેં સાહિત્યને નહીં, સાહિત્યએ મને સમૃદ્ધ કરીઃ વર્ષા અડાલજા
મનુભાઈ પંચોળી દર્શક ફાઉન્ડેશન એવોર્ડ અને ગુજરાત વિશ્વકોશ ટ્રસ્ટના સંયુક્ત ઉપક્રમે શનિવારે ગુજરાત વિશ્વકોશ ભવનમાં લેખિકા વર્ષા અડાલજાને દર્શક ફાઉન્ડેશનનો વર્ષ ૨૦૧૬નો એવોર્ડ એનાયત કરાયો હતો. સામાજિક-રાષ્ટ્રીય પરિસ્થિતિ અને પરિવર્તનનું કલાત્મક નિરૂપણ કરનાર દીર્ઘ નવલકથા “ક્રોસરોડ' માટે વર્ષા અડાલજાને આ એવોર્ડ અપાયો છે. એવોર્ડ સ્વીકારતાં તેમણે કહ્યું કે, આપણી પહેલાં અનેક લોકો ઉત્તમ સર્જન કરી ગયા છે અને આવનારા સમયમાં પણ કરશે. એટલે હું એવું કહીશ કે, મેં સાહિત્યને નહીં પણ સાહિત્યએ મને સમૃદ્ધ બનાવી છે. પાત્રોની સંવેદના અનુભવીને હું એક ઉમદા વ્યક્તિ બનવા તરફની સફર ખેડી શકી.
જ્યારે ક્રોસરોડ નવલકથા અંગે વાત કરતાં તેમણે જણાવ્યું કે, મહેન્દ્ર (વર્ષા અડાલજાના પતિ) આઈસીયુમાં હતા, ત્યારે વેઈટિંગરૂમમાં બેઠા બેઠા મૃત્યુદંડ તો લખી નાખી હતી, પણ ત્યારે મનમાં અનેક સંસ્મરણો ચાલતા અને વિચાર આવ્યો કે, વહી ગયેલા સમયને ફ્રીઝ કરી લઈએ તો? અને મેં એક તારીખ લખી ૧૯૨૨, આમ, તારીખોની યાદી બનાવતી ગઈ ત્યારે મારું પાત્ર કયાં કયાં શું શું કરે શું પહેરે એ વિચારતી ગઈ. મારે ઈતિહાસની તિરાડોમાં પુરાયેલી વાર્તાઓને બહાર લાવીને મારા પરિવારની કથા લખવી હતી. જો કે, સમયમાં ફ્રીઝ કરી લેવામાં પણ ભયસ્થાન છે, લેખક ફોટોગ્રાફર નથી, એ એક ચિત્રકાર છે, ફોટોગ્રાફરે કેદ કરેલા સૂર્યમાં ચિત્રકાર પોતાના રંગો પૂરે છે, ત્યારે એ એક સર્જન બને છે.
આ પ્રસંગે ધીરુબેન પટેલે જણાવ્યું કે, મારો અને વર્ષાનો સંબંધ સંબંધમાં અંગત અને જાહેર વચ્ચેની સમતુલા જાળવવી અધરી થઈ જાય એવો છે. વર્ષા લેખિકા ન થઈ હોત, સફળ અભિનેત્રી જરૂર બની હોત. આ પ્રસંગે રઘુવીર ચૌધરી, કુમારપાળ દેસાઈ અને પ્રકાશ ન. શાહે પ્રસંગોચિત વાત કરી હતી, જ્યારે મહેન્દ્રસિંહ પરમારે ક્રોસરોડ નવલકથા વિશે વિગતે વાત કરી હતી.
નવેમ્બર - ૨૦૧૭
પ્રબુદ્ધ જીવન