________________
विवणिमज्झम्मि रायपुत्ततुरंगमेण हया सा भूमीए पडिया । अह उट्ठिया सा भग्गभायणा पडिए वि तक्के विसेसओ विम्हियमुहा तयणुवलक्खणपरेण एगेण पुरिसेण 'हे सुंदरि ! पडियं पि तक्कं न सोएसि तं किं' ति ? पुट्ठा । तं अणुवलक्खमाणी सा नियं सरूवं कहित्था । जं नरिंदं हंतूणं, सप्पदटुं पई पेक्खिऊण देसंतरम्मि विहिवसाओ गणिगा हं जाया । तओ पुत्तेण सद्धि संगम विहेऊण चियाए पविट्ठा, अहुणा गोवरोहिणी जाया, अहं कहं अज्ज तक्कं सोएमि । वुत्तं च -
हच्चा निवं पइमवेक्ख भुयंगदटुं, देसंतरे विहिवसा गणिग म्हि जाया । पुत्तस्स संगमहिगम्म चियं पविठ्ठा,
सोएमि गोवगिहिणी कहमज्ज तक्कं ॥ इअ सोच्चा नियसरूवं च निवेइऊण तेणावि कुबेरसेणेण तप्पुत्तेण सा संजईणं पासम्मि समाणीआ। तओ सा पुष्पवई तीए उवएससवणेण संजायवेरग्गा दिक्खं गिण्हित्था । आलोइयासुहकम्मविवागा सा विहियविविहतवकम्मा सग्गलोगे समुप्पण्णा, कमेण महाविदेहम्मि सिद्धि पाविहिइ ।
पुष्फवईइ दिद्रुतं, कम्मविवागदंसगं ।। सोच्चा तह विहेयव्वं, जह दुक्खं न तारिसं ॥
एवं दुक्खपरंपराए पुष्फवईए कहा समत्ता ॥
- विक्कमचरित्ताओ कहारयणयराओ य ।
(५) को महंतयमो ? इह हरि-हर-बम्हदेवाणं कहा तिलोगगयदेवाणं, गुणुत्तमवियारणे ।
को हि महत्तमो देवो, वुत्तं चेह नियंसणं ॥ हरि-हर-बम्हाणं एगया विवाओ संजाओ - अम्हाणं मज्झम्मि को महंतयमो अत्थि ? बम्हा वएइ - जयम्मि सव्वपयत्थसमुप्पत्तिकारगाओ अहमेव । हरी कहेइ – वीसजंतुपालणभावाओ अहं चिय, अण्णह जगजंतुणो न जीवेज्जा । हरो साहेइ - पावाणं वुड्डीए जगसंहारकरणे मम सत्ती अत्थि, तेण महंतो हं । एवं एएसिं विवाए संजाए बम्हरिसिणा कहियं – भिगुरिसिसमीवम्मि अस्स निण्णयं करावेमो। एयम्मि महेसो संमओ संजाओ । किंतु विण्हू संमओ न जाओ, जओ अम्हासु विज्जमाणेसु सो रिसी जया अम्हाणं आहारेण जीवइ, तया सो किं निण्णयं काही ? इअ कहित्ता सो सह न गओ ।
१. तदनुपलक्षणपरेण ॥
