________________
प्राकृतधाश्रयमहाकाव्यम्
जित्तिअमत्तं रत्तो म्हि एत्तिअं रच्च एत्तिलं किमिमं । केण वि एद्दहमुत्ता तुण्हिक्का माणिणी जाआ ॥८०॥ सिहिओ सि जेत्तिअं जेत्तिलं च भणिओ सि जेद्दहं थविओ । न हु तेत्तिएण होसि त्ति पई कीइ वि उवालद्धो ॥८१॥ तं तेत्तिल-पेम्मं तुह न केत्तिअं तेदहा य अणुवित्ती । न हु केत्तिला वि केद्दहमित्थं कीइ वि सढो भणिओ ॥८२।। सयहुत्तं विणइल्लो दइओ जोण्हाल-चन्द-सिरिमन्तो । णेहालूए कीइ वि बाहुल्लच्छीइ अहिसित्तो ॥८३।। गव्विर न माणइत्ता सहन्ति गव्वं ति भणिअ कीए वि । दइओ हणिओ हणुमा-लंगूल-पलम्ब-लट्ठीए ॥८४॥ अन्नत्तो अन्नहि एसि तह वि अन्नत्थ अन्नदो जासि । एक्कसि न खु त्थिरो सि त्ति पिओ कीइ वि उवालद्धो ॥८५।। एक्कसिअं चिअ भणिओ एकइआ णेगया य गामिल्लिं । अप्पुल्ल-पियं वच्चेत्ति भच्छिओ को वि अन्नाए ॥८६॥ निच्च-नवल्लय-रच्चिर में एक्क-मणं नवाणुराइल्लं । एकलं चिअ मुंचसि कीइ वि रमणम्मि इअ रुन्नं ॥८७।। अवरिल्लंचल-गहिओ भालोवरि-निहिअ-भुमयमन्नाए । भमया-दासो व्व पिओ विहसन्तो सणिअमवगूढो ॥८८।। मणयं च मुच्छिरो वेविरो अ मणिअं पिओ मणा हसिरो । कीइ वि रइ-मीसाए वम्मह-मीसालिओ रमिओ ॥८९।। गिम्हो दीह-गन्ध-अन्धालिणि-दीहर-पत्त-चम्पओ। मण-मउअत्तयाइ कामन्धल-विज्जुलिआ-दुरिक्खओ । दिट्ठो विज्जु-पीअ-नव-किंसुअ-पत्तल-पीवलोवणो तत्ताऊ विओअ-विहुरीकय-पन्थिअ-गोण-खेअणो ॥९०॥
इति तृतीयः सर्गः ॥
