________________
प्राकृतविभागः
कलिकालसर्वज्ञश्रीहेमचन्दाचार्यविरचितं प्राकृतद्व्याश्रयमहाकाव्यम्
तृतीयः सर्गः कय-वम्मह-सामच्छं वर-सामत्था कओसवमुहिं । नयणोच्छवमुज्जाणं गओ निवो उच्छुओ दटुं ॥१॥ जय-छिह-ऊसुअ-मयणो अवज्ज-निप्पिह-सभज्ज-जुव-लोओ । अलि-सेज्ज-चूअ-कलिओ तओ पयट्टो वसन्त-उऊ ॥२॥ अहिमज्जु-जणय-अहिमंजु-माउ-भायाहिमन्नु-पमुहाण । अहिउच्चिआसि मयणो अणवंझासज्झ-कुसुम-सरो ॥३॥ गय-सज्झसस्स मयरद्धयस्स कुसुमज्झओउ-दुइअस्स । कंकेल्लि-पल्लव-मिसा आसि पयावो समिज्झन्तो ॥४॥ पट्टण-वहु-वलयाइअ-वट्ट-पयट्टालि-मण्डलो चूओ । पवण-कवट्टिअ-कुसुमरज-सुरहि-महि-मट्टिओ जाओ ॥५॥ ... कामिणि-धुत्तिम-वत्ता-निवत्तणो वल्लि-नट्टईण नडो । पयडिअ-वम्मह-वट्टो सिढिलिअ-वासन्तिआ-वेण्टो ॥६॥ विरहिणि-विसण्ठुलट्ठी-करणो रइणाह-रइ-महु-चउट्ठो । कामट्ठत्थो सुहओ चउत्थ-पुरिसत्थगाणं पि ॥७॥ ठीणम्बु-सीअलो थीण-चूय-लट्ठि-महु-बिन्दु-चुम्बणओ । वम्मह-संदट्टेसुं इट्ठाघाओ महुट्टिअओ ||८|| मुह-गड्ड-निबुड्डेहिँ व उच्च-विअड्डि-ट्ठिएहिँ पिज्जन्तो । छड्डिअ-मलउज्जाणो मड्डिअ-वेइल्ल-विच्छड्डो ॥९॥
