________________
प्राकृतघ्याश्रयमहाकाव्यन्
जत्थ चुलुक्क-निवाणं परिमल-जम्मो जसो कुसुम-दामं । नहमिव सव्व-गओ दिस-रमणीण सिराइ सुरहेइ ॥२२॥ सव्व-वयाणं मज्झिम-वयं व सुमणाण जाइ-सुमणं व । सम्माण मुत्ति-सम्मं व पुहइ-नयराण जं सेयं ।।२३।। चम्मं जाण न अच्छी णाणं अच्छीई ताण वि मुणीण । विअसन्ति जत्थ नयणा किं पुण अन्नाण नयणाई ॥२४॥ गुरुणो वयणा वयणाइँ ताव माहप्पमवि य माहप्पो । ताव गुणाई पि गुणा जाव न जस्सि बुहे निअइ ॥२५॥ हरि-हर-विहिणो देवा जत्थन्नाइँ वि वसन्ति देवाइं । एयाए महिमाए हरिओ महिमा सुर-पुरीए ॥२६।। । जत्थञ्जलिणा कणयं रयणाइँ वि अंजलीइ देइ जणो । कणय-निही अक्खीणो रयण-निही अक्खया तह वि ॥२७|| तत्थ सिरि-कुमर-वालो बाहाए सव्वओ वि धरिअ-धरो । सुपरिट्ठ-परीवारो सुपट्ठो आसि राइंदो ॥२८॥ तुह आणा-ओमालं सिरम्मि धरिमो जहा अणिम्मल्लं । अम्हे एत्थाऽम्हेत्थ य इअ भणिउं जो निवेहि नओ ॥२९॥ तुह हरि-पिआ जइ इमा किं पि पिआ किमवि मेइणी जइमा । ता कि ति मए त्ति रुसेव जस्स कित्ती गया दूरं ॥३०॥ जो दूसासण-रिउणो आसत्थामस्स राम-सीसस्स । वीसामिअ-जस-पसरो स-जसेणं कासवि-तलम्मि ॥३१॥ वीसुं वासा-नीसित्त-महि-अले ऊस-मालि-तेअस्स । रज्जे जस्स न कास वि नीसत्तं नीसहत्तं वा ॥३२॥ गण-सामिद्धी पयडा कला-समिद्धी वि पायडा जस्स । जो दाहिण-पवण-निहो दक्खिण्ण-निही गुणि-वणाण ॥३३।। सिविणम्मि वारण-बलं सुमिणम्मि अ आस-साहणं जस्स । दिण्ण-भयं पिच्छंता दत्त-करा रिउ-निवा जाया ॥३४॥ अंगार-पिक्क-गोल्ले खाए इंगाल-पक्क-कंदे अ । तत्त-निलाडा रिउणो जस्स णलाडं-तवे तवणे ॥३५।।
९६
