________________
___ अनुसन्धान-६६
मन रच्चि रमणि रमणीय-देहि, वस-मंस-रुहिर-मल-मुत्तगेहि। .. दढदेविरत्त मालवनरिंदु, गयरज्जपाणु हुअ पुहविचंदु ॥५॥ . इक्केण वि आसवि पुरिस मत्तु, अह पडइ झत्ति सिढिलेवि गत्तु । पंचासवि सत्तउ जुज्झि होइ, तसु का गइ त्ति न मुणउं लोइ ॥६॥ पंचिंदिय विसय पसंगरेसि, मणु वयणु कायु नवि संवरेसि । तं वाहसि कत्तिय गलपएसि, जं अट्ठ कम्म नवि निज्जरेसु(सि) ॥७॥ अह सत्त नरय तिरि मेरु पंच, अस्संखदीवसायरपवंच ।। बारह नव सग्ग पणुत्तराणि, इहलोयह वित्थर निउणु जाणि ॥८॥ चउविह कसायविसहरण मंतु, जिणवयणु सुणइ जे पुन्नवंतु । । घण पुलइअंगि मणि सद्दहंति, सिवलच्छिवच्छि ते हारु हुंति ॥९॥ वर हरि करि रह भड सज्जरज्जु, पाविज्जइ भवि भवि भूरिभज्जु । नवि लब्भइ दुल्लह पुण पवित्तु, अरिहंत देव गुरु साहु तत्तु ॥१०॥ : इय बारसभावण सवण सुहावण भणवि एव जीवहं सरिसु (?) । दुलहुउ मणुयत्तणु धम्मपवत्तणु, दस दिलृतिहिं बज्जरिसु ॥११॥ इह अणाय(इ)म्मि संसारि तमणाइओ, आसि गोलेसु कम्मेहिं मुच्छाइओ। तो अणंताउ कालाउ पावड्डिओ, तं निगोयाउ भवियव्वयाकड्डिओ ॥१२॥ पुढविकायाइछक्कायकायट्ठिओ, णंतकालं च पुण मरवि तत्थ ट्ठिओ । तो अकामेण निजरियकम्मंसओ, तंसि कहकहवि उ[प्प]न्नु माणुस्सओ ॥१३॥ चुल्लगाईहिं दिटुंतदसदुल्लहे, जीव! संपत्ति मणुयत्तणे वल्लहे । जं जि जिणधम्म सामग्गि मुक्खंकरी, सज्जि तुह जाइ सग्गोवरे मंजरी ॥१४॥ पुणवि रे जीव! सामग्गि एवंविहा, अन्नजम्मम्मि मन्नामि तुह दुल्लहा । ता पमाएण सा कीस विहलिज्जए, मणुयभवतरुह धम्मप्फलं लिज्जए ॥१५॥ दहइ गोसीसुसिरिखंड छारंकए, छगलगहणट्ठमेरावणं विक्कए । कप्पतरु तोडि एरंड सो वावए, जुज्जि विसएहिं मणुयत्तणं हारए ॥१६॥ सुमिणपत्तम्मि रज्जम्मि सो मुच्छए, सलिलसंकंतु ससि गिन्हिउं वंछए । अधिय(?)खित्तेसु धन्नाई सो कंखए, जुज्जि धम्मेण विणु सुक्खमाविक्खए ॥१७॥ किं तुमंधो सि? किंवा वि धत्तूरिओ?, अहव किं सन्निवाएण आऊरिओ ?। अमयसम धम्मु जं विस व अवमन्नसे, विसयविस[मेव] अमयं व बहु मन्नसे ॥१८॥
