________________
(१०) श्रीयाकिनीसूनुहरिभद्रसूरिप्रणीतम् 'श्रीधूमावलीप्रकरणम्' (प्राय ईस्वी ७५०-७७५)
(गाथाछंदः) असुरिंदसुरिंदाणं किन्नरगंधव्वचंदसूराणं । विज्जाहरियसुराणं सजोगसिद्धाण सिद्धाणं ॥ १ ॥ मुणियपरमत्थवित्थर-विगिट्ठविविहतवसोसियंगाणं । सिद्धिवहुनिब्भरुक्कंठियाण जोगीसराणं च ॥ २ ॥ जे पुज्जा भगवंतो तित्थयरा रागदोसतमरहिया । विणयपणएण तेसिं सुद्धओ मे इमो धूओ ॥ ३ ॥ तित्थंकरपडिमाणं कंचणमणिरयणविहुममयाणं । तिहुअणविभूसगाणं सासय-सुखक्खयाणं च ॥ ४ ॥ चमरबलिप्पमुहाणं भवणवईणं विचित्तभवणेसु । जाओ य अहोलोए जिणिंदचंदाण पडिमाओ ॥ ५ ॥ जाओ य तिरियलोए किन्नरकिंपुरिसभूमिनयरेसु । गंधव्वमहोरगजक्खभूय तह(य)रक्खसाणं च ॥ ६ ॥ जाओ य दीवपव्वय-विज्जाहरपवरसिद्धभवणेसु । तह चंदसूरगहरिक्ख-तारगाणं विमाणेसु ॥ ७ ॥ जाओ य उड्डलोए सोहम्मीसाणवरविमाणेसु । जाओ मणोहरसणंकुमारमाहिंदकप्पेसु ॥ ८ ॥ जाओ व बंभलोए-लंतयसुक्के तहा सहस्सारे । आणयपाणयआरण-अच्चुयमकप्पेसु जाओ य ॥ ९ ॥ जाओ गेविज्जेसुं जाओ वरविजयवेजयंतेसु । तह य जयंतपराजियविमाणसव्वट्ठसिद्धेसु ॥ १० ॥ सिद्धाण य सियघणकम्म-बंधमुक्काण परमनाणीणं । आयरियाण तहेव य पंचविहायारनिरयाणं ॥ ११ ॥
