________________
૧૭૦
પ્રીતિ પાણી પીધાં પ્રભાવતીના હાથથી, તત્ત્વ તંબોલ લીધાં શિયલ સોપારી સાથ, અક્કલ એલાયચી આપીને માતા મુખ વદે, ત્રિભુવન તારી તરજ્યો જગજીવન જગનાથ. માતા વામાદે. ૮. પ્રભુના થાળ તણા જે ગુણ ગાવે ને સાંભળે, ભેદ ભેદાન્તર સમજે જ્ઞાની તેહ કહેવાય, ગુરુ ગુમાન વિજયનો, શિષ્ય કહે શિરનામીને, સદા સૌભાગ્ય વિજય થાએ, ગાવે ગુણ સદાય. માતા વામાદે. ૯.
અર્થ એક વખતની વાત છે કે જ્યારે શ્રી પાર્શ્વનાથ પ્રભુ બાલ અવસ્થામાં હતા ત્યારે તેમનાં માતા વામાદેવી તેમને જમવા માટે બોલાવે છે, અને પછી પ્રભુ જ્યારે જમવા બેસે છે ત્યારે વામામાતા તેમને જમણમાં કઈ કઈ વાનગીઓ પીરસે છે ? કરો ત્યારે વાંચવાની શરૂઆત. જોજો મોંઢામાં પાણી ન છૂટે, આ બધી તો ભાવ વાનગીઓ છે.
જમવામાં થાળી મૂકવા માટે જે બાજોઠ જોઇએ તે બુદ્ધિરૂપી બાજોઠ લઈને ત્રણ જ્ઞાનના સ્વામી એવા પ્રભુ જમવા બેસે છે. વામા માતા તે બાલ પ્રભુની આગળ વિનયરૂપી થાળ સ્વચ્છ કરીને મૂકે છે.
હવે આ થાળની અંદર વામા માતા બાલ અવસ્થાવાલા પ્રભુને જમણ પીરસવાની શરૂઆત કરે છે. દાન રૂપી દાડમના દાણા ફોલીને આપે છે. સમકિત શેરડીને છોલીને તેના નાના નાના કટકા કરી પુત્ર (લાલ) આગળ મૂકે છે. સમતારૂપી સીતાફળનો રસ પણ કાઢી આપે છે. જુક્તિરૂપી જામફલ પણ કાપીને ખાવા માટે આપે છે. ચિત્તની નિર્મલતા રૂપી ચૂરમાના લાડવા ખાવા આપે છે. તેમાં સુમતિરૂપી સાકર છે અને ભાવરૂપી ઘી ભેળવેલું છે. ચૂરમું ખાવા માટે સાથે ભક્તિરૂપી ભજિયાં પીરસે છે. અનુભવરૂપી અથાણાં પણ સાથે આપે છે. જ્ઞાનનાં ગૂંદવડાં અને પ્રેમના પેંડા પીરસે છે સાથે જાણપણાની જલેબી પણ મૂકવામાં આવે છે. દયારૂપી દૂધપાક પણ આપવામાં આવે છે, સંતોષરૂપી શીરો
