Page Text
________________
ત્યારબાદ ગુરુદેવે જયંતમુનિજીને પાસે બોલાવી પ્રેમથી બેસાડ્યા. ગુરુદેવ કશું કહે એ પહેલાં જ ગળગળા થઈ ગયા. પ્રેમથી તેમનું હૃદય ભરાઈ આવ્યું. વાણી અવરુદ્ધ થઈ ગઈ. જયંતમુનિજીએ ગુરુદેવનાં ચરણ પકડી લીધાં. ખોળામાં માથું મૂક્યું. ગુરુદેવે પોતાનો પ્રેમાળ હાથ તેમની પીઠ પર ફેરવ્યો. થોડા સ્વસ્થ થયા ત્યારે ભલામણ કરી :
“જયંતી, તારો અભ્યાસ તો બરાબર છે, પરંતુ તપસ્વીજીની સાથે તું જઈ રહ્યો છે. તેમનું મન તપસ્યાને કારણે નાજુક છે. એટલે તારે પૂરું ધ્યાન રાખવાનું છે. તપસ્વી મહારાજની અવહેલના ન થાય, તેનું દિલ જરા પણ ન દુભાય તેનો પૂરો ઉપયોગ રાખવાનો છે. અત્યારે ફક્ત તારા પિતા નથી, પરંતુ વડીલ ગુરુબંધુ છે. તમે વિહાર કરશો ત્યાર પછી તેમને ગુરુપદે સ્થાપ્યા છે. તારે તેમનો પડ્યો બોલ ઝીલવાનો છે. તારી ઇચ્છાથી વિપરીત હોય તો પણ તપસ્વી મહારાજની આજ્ઞાને અંતિમ માની તેનો અમલ કરવાનો છે. હઠાગ્રહ કે કદાગ્રહમાં જરાપણ જવું નહીં. મુનિની મર્યાદાઓથી ચાલવાનું. તમે બે સંત છો. ત્રીજું કોઈ વચમાં સમજાવનાર નથી. જરાપણ ઊંચે સાદે બોલાય કે વિવાદ થાય તો સમાજ પર ખોટી અસર પડે. તમો પણ વગોવાઈ શકો છો. માટે મારી ખાસ ભલામણ છે કે તારે આ બાબતમાં જાગ્રત રહેવાનું છે. તું નવા વિચાર ધરાવે છે. તપસ્વીજી જૂની માન્યતા પ્રમાણે વિચારતા હોય. આમ વિચારભેદ થવાનો અવકાશ છે. પરંતુ ગમે તેવો વિચારભેદ થાય છતાં તેનું દ્વેષમય રૂપ થવું ન જોઈએ. જ્યાંસુધી તપસ્વી મહારાજ આજ્ઞા ન આપે ત્યાં સુધી વિચારો પડતા મૂકીને પણ તેમની આજ્ઞાને માન આપવું.”
અનુભવનું અનુપમ ભાથું :
પૂજ્ય ગુરુદેવે જયંતમુનિજીને આ રીતે નાનીમોટી ઘણી વાતો સમજાવી અને ઉચ્ચકોટિના વિચારોનું ભાથું બંધાવ્યું. ધન્ય છે એમના હૃદયની વિશાળતાને ! ત્યારબાદ બંને સંતોને સાથે બેસાડી, સંપ્રદાય સંબંધી અને વિહારક્ષેત્રો સંબંધી જરૂરી વાતો સમજાવી. ગોંડલ સંપ્રદાયને અન્ય સંપ્રદાય સાથે જ્યાં જ્યાં કામ પડે ત્યાં કેવી રીતે વર્તવું તે વિશે પણ ધ્યાન ખેંચ્યું.
(૧) તમે ગુજરાત છોડી રાજસ્થાન અને મેવાડના ક્ષેત્રમાં જશો, તો ત્યાં મારવાડી સંતોના સંપ્રદાયભેદ જોવા મળશે.
(૨) ધર્મદાસજીનો સંઘ, હુકમચંદજી મહારાજનો સંઘ, ચોથમલજી દિવાકર મહારાજનો સંઘ અને એ સિવાય બીજા કેટલાક મોટા સાધુઓના અલગ અલગ સંઘાડા અને તેમનાં અલગ અલગ સ્થાનકો રસ્તામાં મળશે. જ્યાં મતભેદ હોય ત્યાં તમો ધર્મદાસજીના સંઘાડાના ઉપાશ્રયમાં ઊતરવાનું રાખશો.
(૩) પૂજ્ય જવાહરલાલજી મહારાજ કાઠિયાવાડ પધારી ગયા છે. ગોંડલ સંપ્રદાય વિશે તેઓ સન્માન ધરાવે છે. જવાહરલાલજી મહારાજના શ્રાવકો સાથે સારો વ્યવહાર રાખવો. એ રચ્યો નવીન ઇતિહાસ Z 81
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |