Page Text
________________
આ સમયે બંને સંતોએ ઘણું કઠણ કાળજું રાખવું પડે તેમ હતું. જયંતમુનિ કરતાં તપસ્વી મહારાજનું હૃદય વધારે વલોવાય તે સ્વાભાવિક છે. તેઓ સમતામય વ્યક્તિત્વના ધારક હોવાથી અને જ્ઞાનપૂર્વક પોતાના આત્માને સમજાવી શકે તેવા સમર્થ હોવાથી તેમણે અપૂર્વ શાંતિનો પરિચય આપ્યો.
જયાબહેન, ગુલાબબહેન અને પ્રાણકુંવરબહેનની દીક્ષાઓ ખૂબ ધામધૂમથી સંપન્ન થઈ. દલખાણિયાથી માતુશ્રી અમૃતબહેન અને મોટોભાઈ શ્રી અમૃતલાલભાઈ સાથે સમગ્ર પરિવાર ઉપસ્થિત હતો. અમૃતબહેને ખૂબ શાંતિ જાળવી રાખી. તેમણે હાર્દિક ભાવે આજ્ઞા પ્રદાન કરી હતી. બીજી બાજુ જયંતમુનિજીની ગુજરાતથી બહાર બનારસ જવા માટેની વિહારયાત્રાની તૈયારી થઈ ચૂકી હતી. વિદાય વેળાની અણમોલ શીખઃ
પૂ. ગુરુદેવ સૌરાષ્ટ્રકેસરી શ્રી પ્રાણલાલજી સ્વામીએ પૂજ્ય તપસ્વી જગજીવન મહારાજને આદેશ આપ્યો કે “તમો જયંતમુનિજીને સાથે લઈ બનારસ પધારો અને તેમને જે અભ્યાસ કરવો હોય તેમાં સહયોગ આપી ગુરુપદ નિભાવો. અત્યારે તમે વડીલબંધુ હોવા છતાં ગુરુ તરીકે આશીર્વાદ આપી, શિષ્ય તરીકે સંભાળી લેશો. કારણ કે અમારાથી હવે જયંતી દૂર જાય છે અને તમને સુપ્રત કરવામાં આવે છે.”
આદેશ આપ્યા પછી ગુરુદેવે તપસ્વી જગજીવન મહારાજને ભલામણ કરી, “જુઓ તપસ્વીજી! જયંતી બાળક છે. યુવાહૃદય છે. નવું લોહી છે. ક્રાંતિકારી વિચારો ધરાવે છે, સાથે સાથે ભણવાની તીવ્ર અભિલાષા છે. તમો શાણા, ચતુર અને ગંભીર છો. એટલે ક્યારે પણ બોલવામાં કે ચાલવામાં ભૂલ કરે, વિનયની મર્યાદા ન જળવાય, ત્યારે તેમને ખૂબ જ જાળવી લેશો. જરાપણ મતભેદ ન થાય તેનો ઉપયોગ રાખશો. ઉદાર હૃદયથી કામ લેશો. તમે અત્યારે પિતા પણ છો અને ગુરુ પણ છો. આપણા સંપ્રદાયની શોભા વધે તે રીતે વ્યવહાર કરશો.”
તપસ્વી જગજીવન મહારાજને પૂજ્ય ગુરુદેવે આટલી ભલામણ કરી ત્યારે તપસ્વીજીની આંખો નરમ થઈ અશ્રુથી ભિજાણી. તપસ્વી જગજીવન મહારાજ બોલ્યા કે “ગુરુદેવ, જયંતીનો અભ્યાસ તો થશે જ. પરંતુ અમારા માટે સૌથી મોટું દુ:ખ એ છે કે આજે આપનાથી અલગ થઈ આપની સેવાથી વંચિત થઈ રહ્યા છીએ. આપે જે ભલામણ કરી તેમાં રતિભાર ફરક નહીં પડે. આપના આશીર્વાદથી બધું પાર ઊતરશે. આપે જે જવાબદારી સોંપી છે તે યથાતથ સંભાળવાની કોશિશ કરીશ. ભગવાનને એ જ પ્રાર્થના છે કે અહર્નિશ આપની કૃપા અમારા ઉપર વરસતી રહે. આપ તો સમર્થ સંત છો. અમે સામાન્ય મુનિર્વાદ છીએ. આપનો વરદ્ હસ્ત અમારા શિર પર કાયમ રહે એ જ અંતરંગ પ્રાર્થના છે.”
સાધુતાનું શિખર અને માનવતાની મહેંક 80
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |