Page Text
________________
કાલાવડમાં વિચારવિમર્શ થયા પછી બધા સંતો અને સાધ્વીજીઓ સાવરકુંડલા પધાર્યા. સાવરકુંડલા સંઘ દીક્ષા ઓચ્છવની બધી તૈયારી કરી ચૂક્યો હતો. ગુરુદેવ શિષ્યો સહિત સાવરકુંડલા પધાર્યા. દીક્ષા ઉત્સવ ઊજવાય તે પહેલાં મહાત્મા ગાંધીની હત્યાનો બનાવ બન્યો. સમગ્ર દેશમાં હાહાકાર મચી ગયો. સાવરકુંડલા તો ગાંધીપ્રેમીઓના જનસમૂહનું મુખ્ય કેન્દ્ર હતું. આખા સાવરકુંડલામાં ચિત્કાર થઈ ગયો. નાવલી નદીના વિશાળ મેદાનમાં જોતજોતામાં વીસ હજાર માણસો એકત્ર થઈ ગયા. ગુરુદેવ સ્વયં જયંતમુનિને સાથે લઈ આ સભામાં પધાર્યા.
ગુરુદેવે કહ્યું, “જયંતી, આ રાષ્ટ્રીય ઘટના છે. તું તો ખાદીધારી છો. તને આ વિષયમાં બોલવું ફાવશે.”
જયંતમુનિજી વીસ મિનિટ સુધી લગાતાર બોલ્યા. જયંતમુનિએ મહાત્મા ગાંધીજીને હાર્દિક શ્રદ્ધાંજલિ આપતાં કહ્યું :
ગાંધીજી સત્યના અવતાર હતા. ઈમાનદારી તેમના કણેકણમાં સમાયેલી હતી. સિદ્ધાંતને ખાતર મરી ફીટવાનો કે બલિદાન આપવાનો તેમનો સંકલ્પ હતો. અન્યાયની સામે ઝૂકવા કરતાં મરી જવું સારું, તેવા દૃઢ વિચારવાળા હતા. તેમણે આખી જિંદગી અન્યાયની સામે લડવામાં વિતાવી. રાષ્ટ્રહિત કરતાં પણ તેમણે સત્ય અને અહિંસાને વધુ પ્રાધાન્ય આપ્યું. આજે તેમનાં આગ્રહને કારણે જ તેઓ દેશને માટે સમર્પિત થયા. ગાંધીજીનો આગ્રહ એટલે સત્યાગ્રહ. આવી વિશ્વવંદનીય વિભૂતિને આજ ભારતની પ્રજા ગુમાવી બેઠી છે. લાગે છે કે આપણે અનાથ થઈ ગયા છીએ. ભારતનું શિરછત્ર ઊડી ગયું છે.”
આવી હૃદયસ્પર્શી શ્રદ્ધાંજલિ અર્પણ કરતા જનસમૂહે જયંતમુનિજીને પ્રેમથી વધાવી લીધા હતા. ગુરુદેવને પણ લાગ્યું કે શિષ્ય તરીકે જયંતમુનિજીએ એમના ગૌરવમાં વધારો કર્યો છે. હરિજનોની હાજરીમાં ગાંધીજીને શ્રદ્ધાંજલિ
બીજે દિવસે આમજનતાના કાર્યકર્તાઓએ બીજી એક સભાનું આયોજન કરાવ્યું. જયંતમુનિજીએ હરિજન પ્રત્યેની ગાંધીજીની લાગણીનો ઉલ્લેખ કર્યો હતો. આ વિશાળ સભામાં મુખ્ય રૂપે સેંકડો હરિજનોને આમંત્રિત કર્યા હતા. મુખ્ય વક્તા તરીકે શ્રી જયંતમુનિજીને આમંત્રિત કર્યા હતા.
ગુરુદેવની અપાર કૃપા હતી. તેઓ જયંતમુનિને લઈ પુન: હરિજન સભામાં પધાર્યા ત્યારે લોકોએ તાળીઓના ગડગડાટથી ગુરુદેવને વધાવી લીધા. અહીં જયંતમુનિજીએ સતત દોઢ કલાક સુધી પ્રવચન આપ્યું. પોતાના જોશીલા પ્રવચનમાં કહ્યું :
હરિજનોને અસ્પૃશ્ય માની જે વ્યવહાર થયો છે તે ભારતીય સંસ્કૃતિનું મોટું કલંક છે. મુળ શાસ્ત્રો કે વેદોમાં વર્ણવ્યવસ્થા છે, પરંતુ અસ્પૃશ્યતાનું નામ નથી. ચાર વર્ણ સમાજનાં ચાર
સાધુતાનું શિખર અને માનવતાની મહેંક 378
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |