Page Text
________________
સુભાષ બોઝના લલકારનો પડઘો સમગ્ર દેશમાં પડ્યો. તેઓ ક્રાંતિકારી હોવાથી અને રાજનીતિના સિદ્ધાંતો જાણતા હોવાથી અહિંસા આંદોલનમાં પૂરો વિશ્વાસ કરતા નહીં. જરૂર પડે તો અંગ્રેજો સામે યુદ્ધ કરવા તૈયાર હતા. તેમણે એક સ્વતંત્ર સેના “આઝાદ હિંદ ફોજ'ની સ્થાપના કરી. સુભાષચંદ્ર બોઝના “ચલો દિલ્હી'ના નારાથી અંગ્રેજ સરકાર ધ્રૂજી ઊઠી. ગાંધી પ્રવૃત્તિને પરિણામે જાગેલા આંદોલનો સામે અંગ્રેજ સરકારને ઝૂકવું પડ્યું.
પોંડિચેરીના યોગી અરવિંદ ઘોષના જન્મદિવસ ૧૫ ઑગસ્ટે અંગ્રેજોએ ભારતની સત્તાનાં સૂત્રો ભારતીય પ્રજાને સોંપી દીધાં. જનતાના આગ્રહથી જયંતમુનિજી આઝાદી ઉત્સવ સભામાં પધાર્યા. સતત દોઢ કલાક સુધી આઝાદી પર ભાષણ આપ્યું, મહાત્મા ગાંધી અને બીજા નેતાઓના જયકાર સાથે ભારતમાતાનો જયકાર કર્યો. આટલી વિશાળ રાષ્ટ્રીય સભામાં બેધડક ભાષણ આપવાનો જયંતમુનિજી માટે આ પ્રથમ અવસર હતો. આ ભાષણમાં તેમણે આઝાદીના અંતરંગ ભાવને પણ સમજાવ્યો હતો. નિર્ણયની ઘડી ?
કાલાવડમાં જયંતમુનિજીનાં સાંસારિક નાનાં બહેન જયાબહેન ધાર્મિક અભ્યાસ કરતાં હતાં. તેઓનો દીક્ષા લેવાનો નિર્ણય અફર હતો. ગુરુદેવ શ્રી પ્રાણલાલજી સ્વામી જામનગરથી કાલાવાડ પધાર્યા. જયાબહેનને સાવરકુંડલામાં દીક્ષા આપવાનું નક્કી થયું. તેમની સાથે ગુલાબબહેન તથા પ્રાણકુંવરબહેન દીક્ષા લેવાનાં ઉમેદવાર હતાં. સાવરકુંડલા સંઘ અપૂર્વ લાભ મળવા બાબત ઉત્સાહ ધરાવતો હતો. શ્રી જયંતમુનિજીએ પુન: ગુરુદેવને વિનંતી કરી કે તેઓ કાશી અભ્યાસ કરવા જવા માટે આજ્ઞાપ્રદાન કરે.
ગુરુદેવ હવે જયંતમુનિના આંતરિક ભાવને પામી ગયા હતા. તેમણે કહ્યું, “જો તપસ્વી જગજીવનજી મહારાજ સાથ આપવા તૈયાર હોય તો જ હું આજ્ઞા આપી શકું. કાશી એકલા જવાય નહીં.”
જયંતમુનિજીનો નિર્ધાર હતો કે સાથ ન મળે તો એકલા ચાલી નીકળવું. ગુરુદેવે રહસ્ય સમજાવ્યું. બે સંત હોવા જોઈએ તેની પાછળનો મર્મ સમજાવ્યો. તપસ્વી મહારાજને સાથે જવા માટે તૈયાર કર્યા. ખરેખર, આ વિચાર ગુરુ મહારાજ માટે શિષ્યનો મહાવિયોગ ઊભો કરનારો હતો, જ્યારે જયંતમુનિજી માટે જીવનને એક નવો અને યશસ્વી વળાંક આપનાર હતો.
અત્યાર સુધી કોઈ પણ સ્થાનકવાસી સંત વારાણસી સુધી વિહાર કરી ગયા ન હતા. અનેક વર્ષો પહેલાં યશોવિજયજી મહારાજ અધ્યયન અર્થે ખાસ વારાણસી ગયા હતા. ત્યારબાદ જૈન સાધુ માટે અધ્યયન કરવા વારાણસી જવાનો આ પ્રથમ અવસર હતો. જયંતમુનિજી માટે જ નહીં, પણ જૈન સમાજ માટે આ એક ઐતિહાસિક ઘટના બની ગઈ.
રચ્યો નવીન ઇતિહાસ 77
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |