Page Text
________________
અણદાબાવાના આશ્રમમાં પરીક્ષા આપવાનું કેન્દ્ર હતું. રાત-દિવસના પરિશ્રમ પછી સંપૂર્ણ મધ્યમા'ની પરીક્ષા આપવાની હતી. પેપર લખાયા પછી પરિણામ બહાર પડ્યું ત્યારે જયંતમુનિજી સારા નંબરે ઉત્તીર્ણ થયા હતા. એમનું પ્રથમ નંબર મેળવવાનું સ્વપ્ન સાકાર થયું નહીં, પરંતુ સંસ્કૃત અને દર્શનશાસ્ત્રના અભ્યાસની પિપાસા વધુ તીવ્ર થઈ. રાજકોટમાં પ્રાણશંકરભાઈએ સંસ્કૃતના અભ્યાસ માટે જે જિજ્ઞાસા જાગ્રત કરી હતી તે હવે વધુ અભ્યાસ વગર સંતોષાય તેમ ન હતી. ઈતિહાસનો નવીન અધ્યાયઃ
મોટા રતિલાલજી મહારાજ અને જયંતમુનિજી જામનગરથી કાલાવડ પધાર્યા. આ તરફ ગુરુદેવ પ્રાણલાલજી સ્વામી પણ કાલાવડ પધાર્યા. પાંચે સંતોનું મિલન થયું. ત્યારે જયંતમુનિજીએ વાત મૂકી કે તેઓ સંસ્કૃતના તથા ન્યાયદર્શનના અભ્યાસ માટે વારાણસી જવા ઇચ્છે છે. રાજકોટ ગુરુકુળમાં પ્રાણશંકરભાઈએ સંસ્કૃતનું રસાસ્વાદન કરાવ્યું હતું. એ પછી પંડિત રોશનલાલજીએ ઉચ્ચ અભ્યાસ કરાવ્યા પછી અને મધ્યમાની પરીક્ષાની સફળતા પ્રાપ્ત કર્યા બાદ સંસ્કૃત અને દર્શનશાસ્ત્રના વધુ અભ્યાસની તૃષા વધુ તીવ્ર થઈ. કાશીના પંડિતો પાસે જઈ વધુ અભ્યાસ કરવામાં આવે તો જ એ જ્ઞાનજિજ્ઞાસા સંતોષાય તેમ હતી. શરૂઆતમાં ગુરુદેવે ધ્યાન ન આપ્યું, પણ ગુરુદેવને અંતરમાં આભાસ થયો હતો કે જયંતી હવે સૌરાષ્ટ્રની સીમામાં બંધાઈ ન જતાં વિશાળ વિહારયાત્રામાં જોડાશે. થોડા સમય માટે વાત વિસારે પડી ગઈ, પણ જયંતમુનિજીના અંતરમાં કાશી જવાની ભાવના વધતી જતી હતી.
આ વર્ષે પૂજ્ય ગુરુદેવનું ચાતુર્માસ જામનગર હતું. શ્રી છગનભાઈ જાદવજી દોશીના આગ્રહથી પૂ. તપસ્વી જગજીવન મહારાજ તથા જયંતમુનિને કાલાવડ ચાતુર્માસ માટે મૂક્યા. કાલાવડથી સ્વતંત્ર ચાતુર્માસનો શુભારંભ થયો. અત્યાર સુધી અભ્યાસ માટે અલગ હતા, પરંતુ આ વરસે ચાતુર્માસ નિમિત્તે ખાસ જુદા પડ્યા. ગુરુકૃપાથી કાલાવડનું ચાતુર્માસ ઘણું સફળ થયું. આ ચાતુર્માસ દરમ્યાન ૧૯૪૭માં ભારતને આઝાદી મળી. પંદરમી ઑગસ્ટે આઝાદીની ઉજવણી કરવાનો અવસર ઉપલબ્ધ થયો. ભારત-પાકિસ્તાનના વિભાજનથી જે માનવસંહાર થયો હતો તેનાં જખમ હજુ રૂઝાયાં ન હતાં, ત્યાં આનંદ-ઉત્સવ ઊજવવો કઈ રીતે ?
કાલાવડના વિશાળ મેદાનમાં એક વિરાટ સભા ભરવામાં આવી. આઝાદી વિશે ભાષણ આપનાર કોઈ નેતા ન હતા. જ્યારે જયંતમુનિજી આ વિષયમાં ઘણો રસ અને જાણકારી ધરાવતા હતા. ભાગલા પડવાથી જયંતમુનિજીની ગાંધીવાદી શ્રદ્ધા ચલાયમાન થઈ ગઈ હતી. હિન્દુ માનસ જાગ્રત થયું હતું. આઝાદી એ ફક્ત ગાંધીમાર્ગનો પુરુષાર્થ ન હતો. લાખો યુવકોએ અને યુવતીઓએ બલિદાન આપ્યાં હતાં. સુભાષચંદ્ર બોઝ આઝાદ હિંદ ફોજની રચના કરી બર્માની ભૂમિ પરથી અંગ્રેજોને લલકાર્યા હતા.
સાધુતાનું શિખર અને માનવતાની મહેંક 076.
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |