________________
સાંજના તમામ શ્રાવકોની એક મિટિંગ ભરવામાં આવી. મુંબઈથી દુર્લભજીભાઈ ખેતાણી વિશેષ આમંત્રણને માન આપી આવી પહોંચ્યા હતા. બિલખાના જેચંદ નાગજી, વિસાવદરના શામળજી ગાંઠાણી, જામનગરથી માનસંગ મંગલજી, રાજકોટથી રામજીભાઈ વિરાણી, જૂનાગઢના જેઠાલાલ પ્રાગજી રૂપાણી, ધારીથી જગજીવન ગોવા, સાવરકુંડલાથી માણેકચંદભાઈ તથા કુબેરભાઈ, ગોંડલથી રતિભાઈ ભાઈચંદ ગોડા, જેતપુરનો દેસાઈ પરિવાર, આ સમગ્ર અગ્રેસર શ્રાવકો દીક્ષા વખતે હાજર હતા. મુંબઈના તમામ શેઠિયાઓ ભાગ લેવા આવ્યા હતા. સભાનો મુખ્ય વિષય હતો કે દીક્ષા વખતે જે સારો ફાળો થાય તેનો શું ઉપયોગ કરવો. સર્વાનુમતે પ્રસ્તાવ પાસ થયો કે વડિયા મુકામે પૂજ્ય તપસ્વીજી માણેકચંદ મહારાજની સ્મૃતિમાં ગુરુકુળની સ્થાપના કરવી. જેતપુરનો બધો ભંડાર ત્યાં લઈ જવો. આમ નક્કી થતાં જ્ઞાનદાનમાં સારી એવી રકમ એકત્ર થઈ. વડિયા પાઠશાળાનો શુભારંભ થશે અને તેનું સંચાલન મણિભાઈ મઢુલીવાળા, દુર્લભજીભાઈ ખેતાણી, દુર્લભજીભાઈ વિરાણી અને જેઠાલાલ રૂપાણી સંભાળશે તેમ નક્કી થયું. ત્યારબાદ દીક્ષા સંબંધી ચર્ચાઓ કરવામાં આવી.
પોતાની દીક્ષા નિમિત્તે વડિયામાં જૈન ધર્મના અભ્યાસ માટે ગુરુકુળની સ્થાપના જેવું મંગલકાર્ય થઈ રહ્યું હતું તેનો જયંતીભાઈને આનંદ સાથે મોટો સંતોષ થઈ રહ્યો હતો. સંસારમાંથી સાધુજીવનમાં મંગલ પ્રવેશની પ્રતીક્ષામાં વૈરાગી જયંતીભાઈએ પ્રશાંતભાવે રાત્રિ વિતાવી.
સાધુતાની પગદંડીએ 67
