________________
પ
રચ્યો નવીન ઈતિહાસ
સવારથી દીક્ષાર્થી જયંતીભાઈ તથા બંને ચંપાબહેન તૈયાર થઈ ગયાં હતાં. જયંતીભાઈના વાળ ઝીલવાનો હક તેમના પરિવારને આપવામાં આવ્યો હતો. બાકી બધાં ઉપકરણોની ઉછામણી કરવાનું નક્કી થયું હતું. શ્રી ભાઈચંદભાઈ ઝાટકિયા ધારી સંઘ તરફથી મુખ્ય ભાગ લઈ સંચાલન કરી રહ્યા હતા. લાગતું હતું કે અત્યારે તેઓનું દુ:ખ ઘણું હળવું થઈ ગયું છે. બહુ નાની ઉંમર હોવા છતાં જયાબહેને આ દીક્ષામાં ખાસ હાજરી આપી હતી. દીક્ષાના વરઘોડામાં બેસાડવાનું તથા તેમના હાથે વરસીદાન દેવાય તેમ સૌએ પ્રેરણા આપી હતી. જયંતીભાઈના રથમાં ભાવદીક્ષિત જયાબહેન, જયાબહેન ઝાટકિયા, દીક્ષાર્થી જયંતીભાઈ અને તેમના સહયોગી પ્રાણભાઈ રૂપાણી, એમ ચાર વ્યક્તિ બેસવાનાં હતાં. સામાન્યપણે જે રીતે દીક્ષાના વરઘોડા નીકળે છે તે રીતે બૅન્ડ-પાર્ટીઓના સમૂહ સાથે દીક્ષાનો વરઘોડો મદનજીભાઈ વિરપાલને ત્યાંથી શરૂ થયો. તેમનાં પત્નીએ વૈરાગી ભાવદીક્ષિતને તિલક કર્યું. ભગવાન મહાવીરના જયનાદ સાથે આકાશ ગુંજી ઊઠ્યું.
વૈરાગીએ વર્ષીદાન દીધું. એ જ રીતે બન્ને ચંપાબહેનની બે ગાડીઓ પણ સાથે સાથે ચાલી રહી હતી. વેરાવળના યુવકોની સેવા અપૂર્વ હતી. દીક્ષામંડપમાં પહોંચ્યા ત્યારે ત્યાં સંત-સાધ્વીઓ આગળથી જ બિરાજમાન હતાં. વૈરાગીઓએ તેમનાં દર્શન કરી, વંદના કરી આશીર્વાદ મેળવ્યા. આખો જનસમૂહ ખામોશ બની ગયો. માતુશ્રી અમૃતબહેનને એક ઊંચા આસને બેસાડ્યાં, તેઓએ પ્રેમથી સામે ચાલી દીક્ષાની આજ્ઞા આપી હતી,
