Page Text
________________
રહ્યા. જયંતીભાઈએ સેવામાં રાત-દિવસ એક કરી અખંડ સેવા બજાવી. ખરું પૂછો તો માનવસેવાનાં બીજ વવાઈ ગયાં. મૂળજીદાદાની સેવા એક નવો પાઠ ભણાવી ગઈ. અત્યાર સુધી બીમારની સેવા કરવાનો અવસર લાધ્યો ન હતો. અમૃતબહેનને ડર લાગ્યો કે જયંતી દાદામાં વધારે પડતો તન્મય થઈ ગયો છે. માતુશ્રીએ હસીને કહ્યું, “જકુ ! તું દાદાની પછવાડે આટલો બધો લાગ્યો છે, સૂતો પણ નથી. દાદા મરશે તો તારા સરમા (શરીરમાં) આવશે.”
જયંતીભાઈએ આ વાત પર ધ્યાન ન આપ્યું. મૂળજીદાદાએ જયંતીભાઈના ખોળામાં જ પ્રાણ છોડ્યા. આ પહેલું જ મરણ હતું જેને આટલા નિકટથી જોવાનો મોકો મળ્યો. દાદાની આંખ ફરી. શાંત થઈ ગયા. જયંતીભાઈ જોર જોરથી રડવા લાગ્યા. ઘરમાં બધાં ભેગાં થયાં. આશ્વાસન આપ્યું. દાદાનો અગ્નિસંસ્કાર પણ જયંતીભાઈના હાથે જ થયો. આ બધું જોયા પછી સંસારની અસારતાનો પૂરો ખ્યાલ આવ્યો. નશ્વર દેહ મૂકી આત્મા અનંતમાં પ્રયાણ કરી જાય છે. દાદા સરમાં તો ન આવ્યા, પણ માથે લાગણીભીના આશીર્વાદ આપી ગયા, જે જીવનની મહામૂલી મૂડી બની રહ્યા. આજે પણ ગુરુદેવને લાગે છે કે મૂળજીદાદાના આશીર્વાદ સુફળ આપી રહ્યાં છે. સંસ્કૃતનું પહેલું વાક્ય “સેવાધર્મપરમગહનો યોગીનામપ્યગમયઃ' અર્થાત્ સેવાધર્મ ઘણો જ ગહન છે. યોગીઓને પણ દુર્લભ છે. ત્યાગ કરી શકે છે, તપસ્યા કરી શકે છે, પરંતુ દીનદુ:ખિયાંઓની સેવામાં રમમાણ થઈને તેની પૂરી માવજત કરવી તે યોગીઓ માટે પણ મુશ્કેલ છે. ખરું પૂછો તો સેવા એ જ ધર્મનો સાર છે. સેવાની સરિતામાં સ્નાન કરી મનુષ્ય ધન્ય બની જાય છે. દાદા ગયા પછી વૈરાગ્યનો રંગ ગાઢો થયો.
રાજકોટ ગુરુકુળમાં કોઈને ખબર ન હતી કે જયંતીભાઈએ ગુરુકુળ છોડી દીધું છે. તેઓ શોધમાં હતા. આખરે રાજકોટ ગુરુકુળના બે વિદ્યાર્થીઓ દલખાણિયા આવ્યા. જયંતીભાઈને સમજાવ્યા. કોઈ પણ હિસાબે મધ્યમા પરીક્ષા દેવા માટે આગ્રહ કર્યો. જામનગર પરીક્ષામાં “યાદ્વાદ મંજરી'નાં પેપર આપવાનાં હતાં. ગુરુકુળના આગ્રહથી જયંતીભાઈ રાજી થયા. પુન: રાજકોટ ગુરુકુળના અધ્યયનમાં જોડાયા. આમ જુઓ તો એક ચક્ર પૂરું થયું. - રાજકોટના ધાર્મિક અભ્યાસ છોડ્યા પછી, હિમાલયના પ્રવાસની ઠોકર ખાઈ, દલખાણિયામાં ગાંધીપ્રવૃત્તિનો પ્રચાર કરી, સૂરજબાઈ મહાસતીજીની કૃપાથી વિચારધારા બદલી, જયંતીભાઈ પુન: રાજકોટ ગુરુકુળ આવ્યા. હવે જયંતીભાઈનો વૈરાગ્ય પરિપક્વ થઈ ગયો છે અને તેઓ ભાગવતી દીક્ષા લેશે તેની પરોક્ષ ભાવે ઘોષણા થઈ ગઈ. વિદ્યાગુરુ દકસાહેબે હવે દીક્ષા લેવાની યોગ્યતા ઉપર મહોર મારી દીધી. ગુરુકુળમાંથી એક વિદ્યાર્થી પણ દીક્ષા લે તો ગુરુકુળનો બધો પ્રયાસ સફળ થશે તેમ રાજકોટ
સાધુતાની પગદંડીએ 59
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |