________________
કરી, ચારે ધામની યાત્રા કરી, પોતાના અનુભવના આધારે યાત્રાને અક્ષરદેહ આપી, તેનું જીવંત મૂર્તિમંત વર્ણન કર્યું છે.
મૂળમાં જયંતીભાઈ પણ યાત્રા અને પ્રવાસના રસિક હતા. આ પુસ્તક હાથમાં આવતાં એ રસમાં ઘણો વધારો થયો. પૂરું પ્રવાસપુસ્તક તેમણે એક વાર નહીં, પણ પાંચ વાર વાંચ્યું. આજે પણ ગુરુદેવ કહે છે, હિમાલયનો પ્રવાસ અમારા અંતરંગમાં વણાઈ ગયો છે. આ પુસ્તક વાંચ્યા પછી તેમને હિમાલયના પ્રવાસનું ઘેલું લાગ્યું.
દરમિયાન રાજકોટ ગુરુકુળમાં હરિદ્વારથી કાંગડી ગુરુકુળના અધ્યક્ષ શ્રી ચંદ્રકુંજ સ્વામી પધાર્યા. તેમણે પણ હિમાલયના પ્રવાસ માટે સુંદર પ્રેરણા આપી.
‘હિમાલયનો પ્રવાસ અને કાંગડી ગુરુકુળના અધ્યક્ષની જયંતીભાઈ ઉપર પ્રબળ અસર થઈ. જયંતીભાઈ વૈરાગીના મનમાં જૈન સાધુ થવા કરતાં હિમાલયમાં એક સ્વતંત્ર અને ત્યાગી સાધુરૂપે પહાડોમાં જિંદગી ગાળવી તેવો વિચાર ઝબકતો થયો. કાંગડી ગુરુકુળમાં અભ્યાસ માટે જવાનો જયંતીભાઈએ નિર્ણય કર્યો.
જયંતીભાઈની જીવનનૌકા ફરી ડોલાયમાન બની. ખરું પૂછો તો ખોરંભે ચડી ગઈ. જયંતીભાઈ રાજકોટ ગુરુકુળ છોડી એકાએક દલખાણિયા આવી ગયા. જે કાંઈ અભ્યાસ બાકી હતો તે બાકી રહી ગયો. દલખાણિયા આવ્યા પછી ખૂબ બેચેન રહેવા લાગ્યા. જૈન દીક્ષા લેવાનું અનુસંધાન અચાનક તૂટી ગયું હતું. પ્રાણલાલજી સ્વામી સાથે સંપર્ક રહ્યો ન હતો. દલખાણિયા આવ્યા પછી, પ્રથમ પ્રકરણમાં વર્ણવ્યું છે તેમ, કેટલાક દિવસ તેમણે શિલાઓ પર ધ્યાન કરવામાં ગાળ્યા હતા. શેત્રુંજી નદીના તટ ઉપર આંબલિયા નદીના કિનારે ઊંચી ટેકરીની ચટ્ટાન તથા પર્વતોના ગાળાઓમાં પરિભ્રમણ કરી, કેટલાય દિવસો ધ્યાનમાં વિતાવ્યા. પોતે અંતરમનમાં ખોવાયેલા રહેતા હતા. મન ઊડીને ક્યાંક બહાર જવા માગતું હતું.
સાધુતાનું શિખર અને માનવતાની મહેક D 42
