Page Text
________________
બંગાળ જેવા માંસાહારી પ્રદેશમાં ગૌરાંગ મહાપ્રભુએ અહિંસાની આલેખ જગાવી હતી અને લાખો નર-નારીઓને એકદમ ચુસ્ત શાકાહારી બનાવ્યાં હતાં. તેમના મુખ્ય ત્રણ મંત્ર હતા. (૧) નામે શ્રદ્ધા (૨) જીવદયા (૩) ઈશ્વરે અનુરાગ. જીવદયા તેમનો મુખ્ય સિદ્ધાંત હતો. ગૌરાંગ મહાપ્રભુના શિષ્યો તેમને અવતારી પુરુષ માની ભગવાન રૂપે પૂજે છે. “હરે રામ, હરે કૃષ્ણ" તેમની મુખ્ય ધૂન હતી. આ ધૂનથી તેમના ભક્તો કલાકો સુધી ભજન-કીર્તન કરે છે. વર્તમાનમાં નદિયા જિલ્લામાં હજારો અમેરિકા અને યુરોપના માણસો “હરે રામ હરે કૃષ્ણ' ધૂનથી રંગાયા છે. તેમણે વિશાળ આશ્રમનું નિર્માણ કર્યું છે. ધીરે ધીરે આ સંસ્થા વિશ્વવ્યાપી બની ગઈ છે. ગૌરાંગ મહાપ્રભુનાં આ દયામય ક્ષેત્રોમાં વિહાર કરતાં અદ્ભુત આનંદની અનુભૂતિ થતી હતી. શ્રી જયંતમુનિને લાગતું હતું કે જૈન સમાજે ગૌરાંગ પ્રભુના સંતો સાથે સાંકળ જોડી, અહિંસા ધર્મનો પ્રચાર કરવાની તક ઊભી કરવી જોઈએ. ગૌરાંગ મહાપ્રભુનું જીવન અને તેમના કડક આચારવિચાર જૈન સાધનાને અનુકૂળ છે.
ફાગણ સુદ પૂનમના શુભ દિને આ મહાપુરુષનો જન્મ થયો હતો. તેમની પત્નીનું નામ વિષ્ણપ્રિય હતું. બંગાળની તે અનુપમ સુંદરી હતી. ચૈતન્ય ગૌરાંગનું સાંસારિક નામ નિમાઈ હતું. તેમની લાખો-કરોડોની સંપત્તિ હતી. તેઓ કાંચન-કામિનીનો સદંતર ત્યાગ કરી ઉત્તમ કોટિના સંત બન્યા હતા.
નદિયાથી આગળ વધતાં શ્રી જયંતમુનિ કિસનપુરમાં રોકાયા. ત્યાં જૈનોની સારી એવી વસ્તી છે. ત્યાં એક જૈન મંદિર છે. ગુજરાતી પાટીદારો પણ છે. કૃષ્ણગરના મહાન શિલ્પી કે. સી. પાલ:
કલકત્તા તરફ આગળ વધતાં બીજું સારું શહેર કૃષ્ણનગર આવે છે. કૃષ્ણનગર કલાકારોનું મોટું કેન્દ્ર છે. વીરાયતનમાં અત્યારે જે કલામંદિર છે તેમાં પણ કૃષ્ણનગરના કલાકારનો મુખ્ય હાથ છે. મહાન શિલ્પી કે. સી. પાલ કૃષ્ણનગરના વતની હતા. તેમના પુત્ર ગૌતમ પાલ પણ તેવા જ મોટા કલાકાર હતા.
શ્રી જયંતમુનિને તેમને બંગલે જ ઊતરવાનું થયું. તેમની શિલ્પશાળામાં પૂ. તપસ્વી જગજીવનજી મહારાજની મૂર્તિ જોતાં શ્રી જયંતમુનિને ઘણું જ આશ્ચર્ય થયું. ત્યારે ખબર પડી કે આ એ જ કે. સી. પાલ હતા કે જેમણે તપસ્વી મહારાજની મૂર્તિનું નિર્માણ કર્યું હતું. તેમણે ગાંધીજી, જમશેદજી ટાટા, અમેરિકાના રૂઝવેલ્ટ , નહેરુ, રાજેન્દ્રબાબુ ઇત્યાદિ મહાનુભાવોની મૂર્તિ બનાવી હતી. તેઓ આરસ, ત્રાંબા-પિત્તળ અને પથ્થર ઉપર શિલ્પનું નિર્માણ કરતા હતા.
પિતા-પુત્ર બન્નેએ ખૂબ જ ઉત્સાહપૂર્વક શ્રી જયંતમુનિનું સ્વાગત કર્યું. ભવાનીપુર કામાણી ભવનની બે બસમાં એક સો જેટલા દર્શનાર્થીઓ આવી ચડ્યા. કે. સી. પાલે સૌને હૃદયથી સત્કાર્યા.
સાધુતાનું શિખર અને માનવતાની મહેંક 3 456
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |