Page Text
________________
ધનબાદના શ્રાવકો :
વચ્ચે ફરકા બંધ પાસેથી રોડ પાર થાય છે. ફરકા પાર કર્યા પછી બહુ જ આનંદપૂર્વક યાત્રા થઈ રહી હતી. ત્યાં અચાનક એક મોટી કાર આવીને શ્રી જયંતમુનિ પાસે અટકી. તેમાંથી ધડાધડ શ્રાવક-શ્રાવિકાઓ ભાવપૂર્વક ઊતરી પડ્યાં. શ્રી જયંતમુનિની કલ્પના પણ ન હતી કે આવા વેરાન સ્થળમાં આપણાં ભાઈ-બહેનો જોવા મળશે. ધનબાદ સંઘનાં ભાઈ-બહેનો દર્શનાર્થે નીકળ્યાં હતાં. તેઓ આગલા દિવસથી ચારે તરફ શ્રી જયંતમુનિની ખોજ કરતાં હતાં. છેવટે નિરાશ થઈ તેઓ ધનબાદ પાછાં ફરી રહ્યાં હતાં. ત્યાં એકાએક મુનિશ્રીને જોઈને તેઓ ખૂબ જ ભાવવિભોર થઈ ગયા.
જેને શોધતા હતા તે અચાનક રોડ પર મળી જવાથી સૌને હર્ષ થયો હતો. અચાનક આવા ભાવિકો મળી જવાથી શ્રી જયંતમુનિને પણ એટલો જ હર્ષ થતો હતો. સૌ વિહારમાં સાથે ચાલ્યા. આગળના નાના ગામમાં ત્રણથી ચાર મારવાડી ઘરો હતાં. ત્યાં નાનું એવું જૈન મંદિર પણ હતું. મુનિશ્રીએ ત્યાં ઉતારો કર્યો અને પ્રવચન પણ આપ્યું.
ધનબાદના ભાઈઓએ આગામી ચાતુર્માસ માટે પ્રાર્થના કરી. તેઓ ચાતુર્માસની વિનંતી લઈને જ દર્શન કરવા માટે નીકળ્યા હતા. આટલી ભક્તિ જોયા પછી શ્રી જયંતમુનિએ આશ્વાસન આપ્યું કે અનુકૂળતા હશે તો ધનબાદમાં ચાતુર્માસ થશે.
પલાશીનું યુદ્ધક્ષેત્ર આ રસ્તામાં આવતું હતું. શ્રી જયંતમુનિ એક દિવસ ત્યાં રસ્તામાં રોકાઈ ગયા અને પલાશીનું રણમેદાન જોવા ગયા. પલાશીના યુદ્ધનું વર્ણન ઇતિહાસમાં પ્રસિદ્ધ છે. યુદ્ધનાં કેટલાંક નિશાન હજુ પણ ત્યાં જોવા મળે છે. થોડી ભાંગી-તૂટી તોપો પણ પડેલી છે. આપણે માનસિક કલ્પના કરીએ ત્યારે ખ્યાલ આવે કે આ પલાશીના મેદાનમાં કેટલી ભયંકર લડાઈ થઈ હશે. અત્યારે ત્યાં લડાઈનું કોઈ સાક્ષી રહ્યું નથી. જૂનાં ઝાડવાઓ પણ સુકાઈને ચાલ્યાં ગયાં છે.
આદિકાળથી માનવજાતિ આ બધાં યુદ્ધો ઝીલતી આવી છે અને તેમાં ઘણા નિર્દોષ માણસો મરણને શરણ થાય છે. લડનારાઓ લડે છે, જ્યારે ભોગવવું પડે છે સમસ્ત પ્રજાને. આટલી વૈજ્ઞાનિક ઉન્નતિ હોવા છતાં આ રાષ્ટ્રો લડાઈને રોકી શકતા નથી. તેમજ યુદ્ધ ન થાય તેવા વિશ્વ માટે કશું કરી શક્યા નથી. સંસાર ઉપર યુદ્ધનાં વાદળાંઓ રોજ ગરજતા હોય છે. શ્રી ચૈતન્ય મહાપ્રભુની કર્મભૂમિઃ -
નદિયા જિલ્લો બંગાળના સુપ્રસિદ્ધ અવતારી પુરુષ શ્રી શ્રી ચૈતન્ય ગૌરાંગ મહાપ્રભુનું જીવનક્ષેત્ર છે. ગંગાને બન્ને કિનારે આવેલાં શાંતિપુર, નદિયા, રામપુર, નવદ્વીપ અને માયાપુરનાં ક્ષેત્રો ગૌરાંગ મહાપ્રભુના સંપ્રદાયનાં તીર્થસ્થાનો છે. હજારો માણસો પ્રતિવર્ષ આ તીર્થસ્થાનોમાં આવે છે. શાંતિપુરની ગાદી હજુ ચાલુ છે. ત્યાંના આચાર્યો તીર્થસ્વામી કહેવાય છે.
ગુરુ-શિષ્યનું મિલન 1 455
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |