Sadhutanu Shikhar Ane Manavtani Mahek

SR No.: 023252
Original Sutra Author: N/A
Author: Harshad Doshi
Publisher: Jain Academy
Publication Year: 2006
Total Pages: 532
Language: Gujarati
Classification: Book_Gujarati
File Size: 16 MB

Page 329

અનાડામાં સારો એવો લાભ આપી મુનિમહારાજ પુરુલિયા પધાર્યા. પ્રથમ વિહારમાં પુરુલિયા જાણીતું હોવાથી ત્યાં ઘણી સાતા ઊપજી. ડાગા પરિવાર તથા બીજા ઓસવાળ પરિવારનાં ભાઈઓ અને બહેનો સેવામાં તત્પર હતાં. ત્યાં ચાર-પાંચ દિવસની સ્થિરતા કરી રાંચી જવાનો કાર્યક્રમ નિર્ધાર કરવામાં આવ્યો હતો. વનાંચલમાં વિહાર:
શ્રી જયંતમુનિજીએ કોલિયારીનો વિસ્તાર પાર કરીને ધીરે ધીરે છોટા નાગપુરના પહાડી અને આદિવાસી વિસ્તારમાં પ્રવેશ કર્યો. અત્યારે જ્યાં બોકારોનું વિશાળ પોલાદનું કારખાનું ધમધમી રહ્યું છે તે સ્થળ પચાસ વર્ષ પહેલાં એકદમ અવિકસિત હતું. એ સમયે ત્યાં રાંચી એક જ પ્રમાણમાં મોટું શહેર હતું. હાલમાં રાંચી ઝારખંડની રાજધાની છે.પૂરા વિસ્તારમાં ગીચ જંગલ અને પહાડો ફેલાયેલાં છે. મોટાભાગની વસ્તી આદિવાસીઓની છે.
મુનિશ્રીને પુરુલિયાથી ચાસમોડ, જયપુર, જાલદા, મુડી અને સિલી થઈ રાંચી પહોંચવાનું હતું. પુરુલિયાથી રાંચીવાળા ભાઈઓએ બધી વ્યવસ્થા કરી હતી.
ચાસમોડ - નારણપુર ડાક બંગલે એક દિવસ રોકાયા. અહીંથી એક રસ્તો ચાસ-બોકારો તરફ જાય છે અને બીજો નેશનલ હાઇવે રાંચી જાય છે. વચ્ચે જયપુર નામનું નાનું દેશી રાજ્ય આવતું હતું. આઝાદી પછી સરકારે જમીનદારી લઈ લીધેલી. ત્યાંનાં રાજા-રાણી એક બંગલામાં રહેતાં હતાં. મુનિવરોની તેમને ત્યાં ઊતરવાની વ્યવસ્થા કરી હતી. ભાંગ્યું-તૂટયું તોય ભરૂચ. ત્યાંનો રાજવૈભવ હજુ એવો જ હતો. રાણીસાહેબે ઘણી ભક્તિપૂર્વક મુનિઓનું સ્વાગત કર્યું. રાજપરિવાર વૈષ્ણવ હોવાથી સંપૂર્ણ નિરામિષ હતો.
જાલદામાં ઓસવાળ પરિવારનો ઉપાશ્રય છે. બધા ભાઈઓ તેરાપંથી હોવા છતાં હાર્દિક સેવા બજાવી. શેઠ ઉત્તમચંદજી એ વખતે સમાજના વડીલ હતા. અહીં આવ્યા પછી જયંતમુનિજીની જાણમાં આવ્યું કે જાલદામાં ચરોતરના પટેલ પરિવાર કરોડોનો કારભાર કરે છે. તેમની ૩૦૩ છાપ બીડી પ્રસિદ્ધ હતી. અત્યારે હિતેષભાઈ તથા તેમનાં પત્ની નયનાબહેન આ બીડીનો કારભાર સંભાળી રહ્યાં છે. તેમને ત્યાં પણ મુનિજીએ પગલાં કર્યા. જાલદાનો પ્રેમ માણી મુનિવરો મુડી પધાર્યા. ત્યાં કૈલાસબહેન પરિવારમાં મુખ્ય વ્યક્તિ હતાં.
મુડીમાં ગુજરાતી પરિવાર હોવાથી જયંતમુનિને અનુકૂળતા ઘણી રહી. શ્રીમતી ઝવેરબહેન ઘણાં ભક્તિવાન અને હોશિયાર હતાં. તેઓએ પણ સારી એવી ભક્તિ બજાવી. હવે રાંચી નજીક આવતાં ત્યાંનાં ભાઈ-બહેનો દર્શનાર્થે આવવા લાગ્યાં હતાં.
સાધુતાનું શિખર અને માનવતાની મહેંક 1 302