Page Text
________________
હતા. ગુરુદેવો ફરીથી રેલ અને રોડના ધોરી માર્ગ ઉપર આવી જતા કલકત્તાથી મોટી સંખ્યામાં દર્શનાર્થી ભાઈ-બહેનો આવવા લાગ્યાં. કહેવું પડશે કે સંઘ નાનો હોવા છતાં અતિથિસેવામાં તેણે ચાર ચાંદ લગાવી દીધા. સૌનું આસનસોલ શ્રીસંઘ પ્રત્યે સન્માન વધ્યું.
સ્થાનિક ભાઈ-બહેનોની વિનંતીને માન આપી મુનિરાજ સીતારામપુર, ચિતરંજન, બરાકર, નિયામતપુર, આદિ ક્ષેત્રોને સ્પર્શ કરી બર્નપુર પધાર્યા. ત્યાં હરગોવિંદભાઈ તથા ધનજીભાઈ છગનભાઈ વરસોથી સાથે રહેતા હતા. બંને સાળા-બનેવી થતા હતા. ધનજીભાઈ જમશેદપુર નિવાસી ભીખાભાઈના નાનાભાઈ હતા. તેમને સંતો પ્રત્યે અપાર ભક્તિ હતી.
બર્નપુરમાં ૨-૪ દિવસની સ્થિરતા કરી મુનિશ્રી દામોદર પધાર્યા. દામોદર નદીના કિનારે દામોદર નામનું રેલવે સ્ટેશન છે, તેથી ગામનું નામ પણ દામોદર પડ્યું છે. ત્યાં એક ગુજરાતી ઠેકેદાર રહેતા હતા. પૂરા પરિવારે ઘણી ભક્તિ બજાવી.
બીજે દિવસે રેલવેના ઓપન પુલ પરથી દામોદર નદી પાર કરવાની હતી. એ સમયે હજુ એટલા પુલ બંધાયા ન હતા. આ ઘણું સાહસભરેલુ અને ભયંકર પગલું હતું. પરંતુ બીજો ઉપાય ન હતો. રેલવેના સ્ટેશન માસ્તરોથી વાતચીત થઈ હતી.
આ રસ્તે માલગાડીઓની ઘણી જ અવરજવર થાય છે. એટલે પુલ પાર કરતી વખતે ગાડી આવી જાય તો સીધી મૃત્યુની જ મુલાકાત થાય. આવા ખુલ્લા પુલ ઉપર વારંવાર અકસ્માતો થતા રહે છે અને ગરીબ માણસો માર્યા પણ જાય છે. પુલ પર ઉતાવળા પગલે ચાલી શકાતું નથી. પ્રભુ મહાવીરનું નામ લઈ મુનિઓએ એક ઝપાટે પુલ પાર કર્યો. છેલ્લું પગલું પ્લેટફોર્મ ઉપર મૂક્યું ત્યારે એક ગાડી ધસમસતી પાર થઈ. હૃદય ધ્રુજી ઊઠ્યાં. એક મિનિટ મોડું થયું હોત તો પરિણામ કેવું આવત? પરંતુ સાક્ષાત્ ધર્મનો પ્રભાવ જોઈ શકાય છે. ઝરિયાથી શંકરભાઈ વગેરે ઘણા ઉત્સાહી ભાઈઓ દામોદર નદીનો પુલ પાર કરવા માટે આવી ગયા હતા.
કલ્પના કરી શકાય છે કે આજથી પચાસ વર્ષ પહેલાં જૈન શાસનના ધ્વજને લહેરાતો રાખવા માટે પૂ. તપસ્વી જગજીવનજી મહારાજ, પૂ. જયંતીલાલજી મહારાજ અને નવદીક્ષિત ગિરીશમુનિએ કેવી વિકટ પરિસ્થિતિમાં પૂર્વભારતનું ખેડાણ કર્યું હતું !
દામોદર પાર કરીને મુનિશ્રીઓ અનાડા પહોંચ્યા. અનાડામાં શ્રી પ્રભાશંકરભાઈ સિનેમાવાળા, વનેચંદભાઈ, છગનભાઈ વગેરે સમૃદ્ધ પરિવારો હતા. આ સિવાય ત્યાં ગુજરાતી ઠેકેદારોનાં પણ ઘર હતાં. ગુરુદેવો પધારવાથી તેઓ ઘણા ખુશ થઈ ગયા. અનાડામાં આવો લાભ મળે તે કલ્પના બહારની વસ્તુ હતી. મણિબહેન ડહાપણવાળા, પ્રભાવશાળી અને ધર્મભક્તિવાળાં હતાં. અત્યારે પણ આ ત્રણે પરિવારનાં સંતાનો જયંતમુનિશ્રી પ્રત્યે અપાર ભક્તિ-શ્રદ્ધા ધરાવે છે અને સેવા બજાવે છે.
બંગાળની સંસ્કૃતિ અને ગ્રામીણ પ્રદેશ 301
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |