Page Text
________________
ગઈ હતી. ધૂનમાં સાથ આપવાથી સહુની ગતિ વધી જતી હતી. શ્રી ભાઈચંદભાઈ પંચમિયા જમશેદપુરના અગ્રગણ્ય શ્રાવક હતા અને નરભેરામ કંપનીના ભાગીદાર હતા. સુખી, સંપન્ન અને પ્રભાવશાળી વ્યક્તિ તરીકે તેમનું આ વિસ્તારમાં ઘણું સન્માન હતું. તેઓ રામજીભાઈ હંસરાજના સાળા થતા હોવાથી તેમને કામાણી બંધુઓ સાથે આત્મીય સંબંધ હતો. શ્રી ભાઈચંદભાઈ, દયાળજીભાઈ મેઘાણી તેમજ જમશેદપુરના બીજા ભાઈઓ પરિવાર સાથે સ્વાગત-સમારોહમાં જોડાયા હતા. ગુજરાતી સમાજના અગ્રેસર તરીકે શ્રી નાનજીબાપા તથા પરીખ પરિવારના શેઠ વલ્લભદાસ એટલો જ ઉત્સાહ ધરાવતા હતા.
ટાટાનગરમાં જૈન મુનિઓનો આ પ્રથમ પ્રવેશ હતો. દેરાવાસી સંતોને પણ ટાટાનગરમાં આવવાનું કોઈ પ્રયોજન ન હતું. કોઈ પણ ફિરકાના સાધુઓએ જમશેદપુરને સ્પર્શ કર્યો ન હતો. પૂજ્ય તપસ્વી જગજીવન મહારાજ તથા શ્રી જયંતમુનિજી જમશેદપુરમાં પધારનાર સૌપ્રથમ જૈન સાધુ હતા. સમાજમાં ઘણું આશ્ચર્ય હતું. મુનિવરો ગુજરાતથી પદયાત્રા કરીને પૂર્વ પ્રદેશમાં પધાર્યા છે તે વાત લોકોના અંતરમાં સ્પર્શી જતી હતી અને આશ્ચર્ય સાથે મુનિઓ પ્રત્યે ભક્તિભાવ ઊભરાતો હતો. ગુજરાતી સમાજમાં આનંદોત્સવઃ
ગુજરાતી સમાજ માત્ર જૈન સાધુ તરીકે નહીં, પણ તેઓ ગરવી ગુજરાતની ભૂમિના સંતો છે, તે રીતે આનંદભેર સ્વાગત કરીને ગૌરવનો અનુભવ કરી રહ્યો હતો અને મુનિજીઓ પ્રત્યે મમત્વ પ્રદર્શિત કરી સંતોષ અનુભવી રહ્યો હતો. દરેક સ્થળે એક જ વાત હતી કે “અરે, આપણા આ સંતો છેક ગુજરાતથી પદયાત્રા કરીને આવ્યા છે.” સમસ્ત જમશેદપુરમાં આ વાત ઠેરઠેર ગુંજવા લાગી. ત્યાંના અખબારમાં તસવીર સાથે સમાચાર પ્રગટ થયા. સહજ ભાવે ટાટાનગરમાં ભવ્ય સ્વાગતનું આયોજન થયુ.
મુનિરાજોએ સર્વપ્રથમ શ્રી નરભેરામભાઈ કામાણીના બંગલામાં પગલાં કર્યાં. અહીં સૌને અલ્પાહાર આપવામાં આવ્યો. શ્રી નરભેરામભાઈએ સર્વપ્રથમ વારાણસીમાં વિનંતી કરી મુનિરાજોને પૂર્વભારતમાં પધારવા માટે પ્રયાસ કર્યો હતો. આજે તેમની ભાવના ફળીભૂત થઈ હતી. ખરેખર, તેઓએ કહ્યું, “મહારાજસાહેબ, આજે મને ઘણો સંતોષ થયો છે. ભગવાને મારી ઇચ્છા પૂર્ણ કરી.”
શ્રીમતી હેમકુંવરબહેન તથા બાળ-પરિવાર સહુ સેવામાં તન્મય હતાં. એ સમયે હેમકુંવરબહેનનો આનંદ અને ઉત્સાહ ચરમસીમા પર પહોંચ્યો હતો. શ્રી નરભેરામભાઈ અને હેમકુંવરબહેન સ્વયં સેવામાં જોડાઈને લાભ લઈ રહ્યાં હતાં. ત્યારબાદ ભગવાન મહાવીરના જયનાદો સાથે શોભાયાત્રાએ બિષ્ટ્રપુરના કોન્ટ્રાક્ટર વિસ્તારના ઉપાશ્રયમાં પગ મૂક્યો.
સાંપ્રદાયિક એકતાનો પ્રસન્ન અનુભવ 235
| SR No. | 023252 |
| Book Title | Sadhutanu Shikhar Ane Manavtani Mahek |
| Original Sutra Author | N/A |
| Author | Harshad Doshi |
| Publisher | Jain Academy |
| Publication Year | 2006 |
| Total Pages | 532 |
| Language | Gujarati |
| Classification | Book_Gujarati |
| File Size | 16 MB |