________________
દર્શનશાસ્ત્રનું અધ્યયન
જયારે જયંતમુનિજી રાજકોટ ગુરુકુળમાં વિદ્યાર્થીરૂપે ભણતા હતા ત્યારે પંડિતજી પ્રાણશંકરભાઈએ જયંતમુનિજીને સંસ્કૃતમાં રસ લેતા કર્યા હતા. તેમની તીક્ષ્ણ બુદ્ધિ અને જિજ્ઞાસાને કારણે પ્રાણશંકરભાઈ તેમને વધારાના વિષયોનો પણ અભ્યાસ કરાવતા હતા અને પુસ્તકો વાંચવા માટે પ્રોત્સાહન આપતા હતા. જયંતમુનિજી પણ અભ્યાસક્રમની બહારના વિષયોમાં પણ ઉત્સાહથી રસ લઈ અભ્યાસ કરતા હતા. પ્રાણશંકરભાઈ બરાબર માર્ગદર્શન આપતા રહેતા હતા.
એક વખત જયંતમુનિજીએ તેમની સલાહ માંગી “મારે ક્યા વિષયનો વધુ અભ્યાસ કરવો જોઈએ?”
પ્રાણશંકરભાઈએ તેને કાવ્યશાસ્ત્ર અને સાહિત્યનો અભ્યાસ કરવાની સલાહ આપી.
જયંતમુનિજીએ કહ્યું કે મારે એવા વિષયનો અભ્યાસ કરવો છે કે જેમાં સામાન્ય રીતે બધા ઊંડા ઊતરતા ન હોય.
પ્રાણશંકરભાઈએ પૂછ્યું, “તને કયો વિષય વધારે પસંદ છે ?”
“ગુરુજી, આપ જ કહો. કયો વિષય વધુ અઘરો છે?” જયંતમુનિજીએ પ્રતિપ્રશ્ન કર્યો.
“દર્શનશાસ્ત્રનો અભ્યાસ અઘરો ગણાય. તેમાં પણ ન્યાય અને નવ્યન્યાય વધુ અઘરા ગણાય છે.” ત્યાર પછી પ્રાણશંકરભાઈએ દર્શનશાસ્ત્રના વિષયોની સમજણ આપી.
