________________
F
૯
ગંગામૈયાની ગોદમાં
આગ્રાથી વિહાર યમુના નદીના ક્ષેત્રમાં થઈ રહ્યો હતો. શ્રી જયંતમુનિજી ગંગામૈયાની ગોદમાં પહોંચવા માટે આગળ વધી રહ્યા હતા. ગંગાજીનો પ્રદેશ નજીક આવતાં ધરતીમાં વિશેષ પ્રભાવ દેખાવા લાગ્યો. ગંગાજીનો સમગ્ર તટપ્રદેશ હરિયાળી ખેતીથી બારેમાસ હર્યોભર્યો રહે છે. ગંગાજીમાં જ્યારે પૂર આવે છે ત્યારે લાખો ટન કાંપવાળી માટી બહુ દૂર સુધી ખેતરોમાં પથરાઈ જાય છે. ગંગાજીનું પૂર જેટલું નુકસાન કરે છે તેથી વધારે ફાયદો પણ કરી જાય છે. પૂરના સમયે ત્યાંના ખેડૂતોએ કશું ગુમાવવાનું રહેતું નથી. ફક્ત થોડા સમય માટે સંકટ ભોગવવું પડે છે. પૂર આવે ત્યારે માણસોને ઉપાધિ થાય છે અને જાનમાલ બચાવવા કોશિશ કરે છે, પરંતુ પૂર ઊતરી ગયા પછી લાખોની સંપત્તિ સહેજે મળી જાય છે.
ખરેખર, ગંગામૈયા તે ગંગામૈયા જ છે! ગંગાજીના અભાવની કલ્પના થઈ શકતી નથી. ગંગાજી ન હોય તો તો આખો પ્રદેશ રેગિસ્તાન જેવો દેખાય, પરંતુ ગંગાજીની અમૃતધારા સમગ્ર પ્રદેશનું સિંચન કરી કંચન વરસાવે છે. ગંગાની પવિત્ર ધારા માત્ર જમીનનું સિંચન નથી કરતી પણ લોકસંસ્કૃતિ અને માણસોના ભાવહૃદયને પણ હજારો વર્ષોથી ભીંજવી રહી છે. અજાણ્યાં ઘરોમાં પણ જે ભાવથી આતિથ્ય-સત્કાર થતો હતો તેમાં પણ શ્રી જયંતમુનિજીને ગંગાજીની ઊછળતી લહેરોનો અનુભવ થઈ રહ્યો હતો. મુનિજી ગંગાના તટીય પ્રદેશનો આનંદ લેતા અને ઉત્તરપ્રદેશની
