________________
कमेण पीवरा ऊरू, रंभाथंभो व्व कोमला । गयस्सेव समारूढा, सामिणो जलधारिणो ॥१७७।। अइगूढं च पुंचिंधं, जच्चस्स तुरगस्स व । सुदीहा मंसला थुला, विसाला कढिणा कडी ॥१७८।। मज्झभागो किसो नाही, सरियावत्तसोयरा । मंसला कोमला निद्धा, कुक्खीओ सरला समा ॥१७९॥ तुच्छरोमोन्नया कक्खा, गंधसेयमलोज्झिया। मज्झसूरं व आयासं, मेरुमझं व भूयलं ।।१८०।। पिहुलं से वच्छयलं, ससिरीवच्छमुन्नयं । दढपीणुन्नया अंसा, वसहक्खंधसोयरा ॥१८१।। आजाणुलंबिणो बाहू, नारगुद्धरणक्खमा । आरत्ता कढिणा उण्हा छिद्दसेउज्झिया करा ॥१८२॥ नहंसुपल्लवा अंगुलीओ कप्पलया विव । लोयसंतावउच्छेदे, सजला दिग्घिया विव ॥१८३।। तिरेहो भव्वपंथाण, मोक्खपंथस्स कारिणो । वयणपुण्णकुंभस्स, सामिकंठो पडिग्गहो ॥१८४।। मसिणा मंसला निद्धा, कवोला तह सामिणो । कमलासरस्सईणं, पल्लंका विव कोमला ॥१८५।। सरलावत्तसोहिल्ला, कण्णा खंधाऽवलंबिणो । रूवलावण्णलच्छीणं, केलिअंदोलया विव ॥१८६।। लावण्णदुद्धसिंधुम्मि, अहरो विद्दुमप्पहो । बत्तीसं दसणा जीहा, गंगातीरे व्व हंसया ॥१८७।। मुहम्मि निवसंतीणं, लच्छीसरस्सईण से । नासावंसो य एयाण, सीमाघाडो व्व रेहई ॥१८८।।
२८८
चन्द्रप्रभचरित्रे द्वितीयः परिच्छेदः ।
