________________
223
नायाधम्मकहाओ [II.i.151णं भंते ! देवीए सा दिव्वा देविड्डी ३ कहिं गया ? कूडागारसालादिद्वंतो। अहो णं भंते ! काली देवी महिड्डिया ३ । कालीए णं भंते ! देवीए सा दिव्वा देविड्डी ३ किन्ना लद्धा किन्ना पत्ता किन्ना अभिसमन्नागया ? एवं जहा सूरियाभस्स जाव एवं खलु गोयमा ! तेणं कालेणं २ इहेव जंबु. हीवे २ भारहे वासे आमलकप्पा नाम नयरी होत्था वण्णओ । अंबसालवणे चेइए । जियसत्तू राया । तत्थ णं आमलकप्पाए नयरीए काले नाम गाहावई होत्था अड्डे जाव अपरिभूए । तस्स णं कालस्स गाहावइस्स कालसिरी नामं भारिया होत्था सुकुमाल जाव सुरूवा । तस्स णं कालस्स गाहावइस्स धूया कालसिरीए भारियाए अत्तया काली नामं दारिया होत्या वड्डा वडुकुमारी जुण्णा जुण्णकुमारी पडियपुयत्थणी निविण्णवरा वरपरिवजिया वि होत्था। तेणं कालेणं २ पासे अरहा पुरिसादाणीए आइगरे जहा वद्धमाणसामी नवरं नवहत्थुस्सेहे सोलसहिं समणसाहस्सीहिं अट्ठत्तीसाए अजियासाहस्सीहिं सद्धिं संपरिबुडे जाव अंबसालवणे समोसढे । परिसा निग्गया जाव पज्जुवासइ । तए णं सा काली दारिया इमीसे कहाए लट्ठा समाणा हट्ट जाव हियया जेणेव अम्मापियरो तेणेव उवागच्छइ २ करयल जाव एवं वयासी - एवं खलु अम्मयाओ ! पासे अरहा पुरिसादाणीए आइगरे जाव विहरइ । तं इच्छामि णं अम्मयाओ! तुब्भेहिं अब्भणुन्नाया समाणी पासस्स णं अरहओ पुरिसादाणीयस्स पायवंदियाँ गमित्तए । अहासुहं देवाणुप्पिया ! मा पडिबंधं करेहि । तए णं सा काली दारिया अम्मापिईहिं अब्भणुन्नाया समाणी हट्ट जाव हियया बहाया कयबलिकम्मा कयकोउयमंगलपायच्छित्ता सुद्धप्पावेसाई मंगलाई वत्थाई पवरपरिहिया अप्पमहग्याभरणालंकियसरीरा चेडियाचक्कवालपरिकिण्णां साओ गिहाओ पडिनिक्खमइ २ जेणेव बाहिरिया उवट्ठाणसाला जेणेव धम्मिए जाणप्पवरे तेणेव उवागच्छइ २ धम्मियं जाणपवरं दुरूढा । तए णं सा काली दारिया धम्मियं जाणप्पवरं एवं जहा दोवई तहा पज्जुवासइ । तए णं पासे अरहा पुरिसादाणीए कालीए दारियाए तीसे य महइमहालियाए परिसाए धम्मं कहेइ । तए णं सा काली दारिया
