________________
२३९
गच्छाचारपइण्णयं वाहियाणि ण वहंति, एवं संकिलिस्संति इओ य पभावतीए आहारो रण्णो उवसाहिओ, जाहे राया तत्थ वक्खित्तो णागच्छति ताहे पभावईए दासचेडी विसज्जिया गच्छ रायाणं भणाहि वेलाइक्कमो वट्टति सव्वमुवसाहिअं किं ण भुंजहित्ति, गया दासचेडी सव्वं कहि तओ राइणा भणिअं सुहिआसि अम्हं इमेरिसो कालो वट्टति, पडिगया दासचेडी तीए दासचेडीए सव्वं पभावतीए कहियं ताहे पभावती भणति अहो मिच्छदंसणमोहिया देवाहिदेवंपि न मुणंति, ताहे पभावती पहाया कयकोउयमंगला सुक्किल्लवासपरिहाणपरिहिया बलिपुप्फधूवकडुच्छयहत्था गया, तओ पभावतीए सव्वं बलिमाइ काउं भणियं देवाहिदेवो महावीरवद्धमाणसामी तस्स पडिमा कीरउत्ति पहराहि, वाहिओ कुहाडो एगघाए चेव दुहा जायं, पेच्छंति य पुव्वणिव्वत्तियं सव्वालंकारभूसियं भगवओ पडिमं सा णेउं रण्णा घरसमीवे देवाययणं काउं तत्थ ठविया, तत्थ य किण्हगुलिया णाम दासचेडी देवयसुस्सूसकारिणी णिउत्ता अट्ठमि चाउद्दसीसु अ पभावती देवी भत्तिरागेण सयमेव णट्टोवहारं करेति, रायावि तयाणुवत्तीए मुरवे पवाएति । अण्णया संझाए पभावतीए णट्टोवहारं कीरंतीए रण्णा सिरच्छाया ण दिट्ठा उप्पाउत्ति काउं आगुलचित्तस्स रण्णो णट्टसमं मुरवक्खोडाण पडंतित्ति रुट्ठा महादेवी अवज्जत्ति काउं, ततो रण्णा लवियं ण मे अवज्जा मा रूससु इमेरिसो उप्पाओ दिट्ठो ततो चित्ताकुलयाए मुरवक्खोडयाण चुक्कोत्ति, ततो पभावतीए लवियं जिणसासणं पवण्णेहिं मरणस्स न भेयव् । अण्णया पुणोवि पभावतीए ण्हायकयकोउयाए दासचेडी वाहित्ता देवगिहपवेसा सुद्धवासा आणेहित्ति भणिया ते य सुद्धवासा आणिज्जमाणा कुसुंभरागरत्ता इव अंतरे संजाया उप्पायदोसेण, पभावईए अदाए मुहं णिरिक्खंतीए ते वत्था पणामिया, ततो रुट्ठा पभावती भणइ, देवयाययणं पविसंतीए किं मे अमंगलं करेसित्ति ? किमहं वासघरपवेसणित्ति अदाएणं दासचेडी संखावत्ते आहया, मया दासचेडी,
