________________
गच्छाचारपइण्णयं
२२८ दुद्धरवेरिरायपराजयसमुद्धरकन्धराबन्धं सिरिजरासन्धं पडिवासुदेवं सेवेउं रायगिहं नगरं गओ, तम्मि समए हत्थिणाउराओ नोहरीऊण सपरियणेहिं पंडवेहिं तस्स देसो छलं लहिय लूसिओ इमं सरूवं दमदंतेण रायगिहाओ वलिएण सुणिएण परमं पओसमुव्वहंतेण नासियदिन्नेणं नियसिन्नेणं सह हत्थिणाउरं समंतओ जंबुद्दीवंपिव लवणसायरेणं वेढियं तओ सो दूयमुहेण पंडवे भणावेइ, अम्ह देसो तुम्हेहिं वीरजणगरहणिज्जेण छलेण उवद्दओ न बलेण जओ - 'छलमुचियं कीवाणं, कीवाणव धणियविरहिए ठाणे । बलवंताण नराणं, न एसमग्गो सुवंसाण ||१|| ता जइ तुम्हाण पयंडं भुयदंडबलमत्थि तो पुराओ निगंतूण मम परक्कमपईवसिहाए सलभलीलमुव्वहह, तओ एवविह दूयवयणतज्जिया अवि पंडवा भयभीया सियाला इव बिलाओ न नीहरिया सनयराओ जुज्झिउं, तओ बहुदिणरोहेण निम्विन्नो दमदंतो हत्थिसीसपुरं गओ एवं चिंतिऊण-खत्तियकुलुब्भवाणं, सम्मुहपताणं सिंहपोयव्व । जुझं काउं उचियं, अन्नह अजसो फुरइ लोए ।।१।। इओ य नाएणं रज्जं पालयंतो दमदंतो कइवयदिणेहिं वइक्कंतेहिं सिरिनेमिनाहसीससिरिधम्मघोससूरिवयणमहद्दहसंभूयसंवेगरस-रंगंततरङ्गतरङ्गिणीए धम्मदेसणाए ण्हाऊण विगयपावसंतावो रज्जमकज्जं, भंडारे कारागारे, पेयसीओ रक्खसीओ, विसए विसेव, चउरंगसाहणं दुग्गइसाहणं च मन्नंतो संवेगं गओ संसारसुखमुज्झिय वज्जिय सव्वसावज्जकज्जमणवज्ज पव्वज्जं पडिवज्जइ, तओ रायरिसी कमेण गीयत्थो होउं विहरंतो पंडवपालिए हत्थिणाउरे गोउरदुयारे मेरुव्व निप्पकंपो पडिमं ठिओ, तम्मि समए रायवाडियाए निग्गच्छंतेहिं पंचहिं पंडवेहिं पलोइय वाहणेहिं उत्तरिय नमंसिओ भावसारं मुणीसरो अहो दुक्करकारओ एस रायरिसी इय अभिनंदिय पुरओ पत्थिएसु तेसु, तत्थ आगओ सपरियणो पयईए दुज्जणो दुज्जोहणो, तं मुणिंदं पिक्खिय अणेणम्हाणं पुव्वपुरिसागयं कित्तिसव्वस्समवहरियं पुव्ववइरमणुसरंतो
