________________
गच्छाचारपइण्णयं
१९०
य दारगो मओ, धाईए हा हि त्ति हलबोलो कओ । जं एस मए रक्खंतीए चेव उच्छंगठिओ हयासेण कयंतेण बालगो निहओ । तं वज्जनिवायसरिसं वयणं सुणिय पुरोहिओ मुच्छानिमीलियच्छो धस त्ति धरणीयले पडिओ । सिसिरोवयारेहिं पुणरवि पत्तचेयणो उग्घाडिऊण कवाडसंपुढं तं सुयं सयं पासिऊण हिययं ताडयंतो रोइउं पयत्तो- हा हा दुरंतरे दिव्व ! रोविऊण सुरद्दुमं । समुम्मूलेसि किं पाव ! मत्तदंतिव्व मे सुयं ।।१।। एयाओ वि दुहाओ अहिययरं दूमेइ सल्लु व्व मे हिययं नाणासच्चत्तणं । एवं सोयं करंतेण तेण जणो वि रोयाविओ, रायावि विन्नायवइयरो आगंतूण तं पुराणाइभणियसंसाराणिच्चयावयणेहिं पडिबोहेइ । इय साहेइ य भो वराहमिहिर ! सिरिभद्दबाहुसामिनिवेइयं नाणमवितहं जायं, परं बिडालाओ जं तस्स मरणमुवइट्टं तं असच्चं दीसइ, अओ तम्मरणहेउ धाइं पुच्छइ, धाइए वि स अग्गला आणेऊण रन्नो दंसिया, तीए अग्गविभागे उक्किरियं बिरालियं दट्ठूण संजायविम्हओ राया सूरिरायगुणकित्तणमुहरियमुहो बज्जरइ, अहो ! पिच्छह पिच्छह लोया ! सेयंवराणं नाणलद्धिलच्छीओ । तं सच्चं चेव सव्वन्नुपुत्तया जं एवमविसंवायणा । एवं चमक्किओ राया उट्ठऊण सिरिभद्दबाहुगुरुं पणमिय पुच्छइ । भयवं केण हेऊणा पुरोहियवयणमसच्चं जायं ? तओ गुरू भणइ-महाराय ! एस गुरुपडिणीओ वयाओ परिवडिओ विणट्ठमइओ तुह पुरोहिओ, तेण हेउणा एयस्स वयणं न सच्चं होइ । जं च सव्वन्नुणा पणीयं वयणं तं जुगंते वि नन्नहा होइ । तओ राया नायपरमत्थो जंपेइहा मिच्छतधत्तूरपाणवामोहियमइणा सयलमवि महियलं कणयमयं मन्नमाणेण मए निरत्थयं मणुयजम्मनिग्गमियं ता भयवं ! पसिय मह सिक्खं देह । जेण सकयत्थो होमि । तओ गुरू दुग्गइगमणपडिवक्खं धम्मसिक्खं सहासमक्खं रन्नो वियरइ । सो वि तं सेसु व्व सिरसा पडिच्छइ । जप्पभिदं मयकलेवरं व पुरोहियमयं चइय राया जिणधम्मं पडिवज्जइ,
·
