________________
१८७
गच्छाचारपइण्णय किंचि । तम्हा तच्छेयणत्थं जिणवरभणिए उज्जया होह धम्मे, खंताईए मुणीणं गुणगणकलिए सावयाणं च सारे ||१|| तं सुणिय वेरग्गतरंगरंगिओ आगमेसिभद्दो पणट्ठमोहनिद्दामुद्दो भद्दबाहू सहोयरं वराहमिहिरं भणइवच्छाहं संजायभवविरागो, एसिं गुरूणं चरणमूले सव्वसंगपरिच्चायं करिय अणवज्जं पवज्जमायरिस्सं, भवया पुण घरकज्जेसु सज्जेण होयव्वं । तो वराहमिहिरो तं पइ जंपइ-भाय ! जइ तुमं संसारसायरं तरिउमिच्छसि ता कहमहं भग्गपवहणजणुव्व तत्थ मज्जेमि, जओ-सक्करसहिया खीरी, दियाण जह वल्लहा हवइ अहिया । ता किं सा इयराण वि, नराण न हु होइ अभिरुइया ।।१।। एवं दिक्खामहिलासं जाणिऊण मा एसो भवावडे निवडउ त्ति भद्दबाहुणा अणुमन्निओ तओ दोवि भायरा गुरुपच्चक्खं सव्वं सावज्ज पच्चक्खायंति । तओ भद्दबाहू गहियदुविहसिक्खो कमेण गुरुवयणकमलाओ भसलुव्व मयरंदं चउद्दसपुव्वसुत्तत्थरहस्सं पाऊण सुहिओ सुविहियचूडामणी जाओ । इओ य सिरिमं सिरिजसभद्दसूरीण असमाणविज्जाठाणो असमाणचरित्तो अज्जसंभूयविजओ नाम सीससेहरो आसि । अन्नंमि दिणे सूरिपयजुग्गे सुयकेवलिणो मुणिय संभूयविजयभद्दबाहू नामए मुणिवरे गणहरपए पट्ठाविऊण सयं सिरिजसभद्दसूरिणों संलेहणं करिय सुरपुरसिरीए अवयंसभावमुवगया | तओ ते ससिसूरुव मिच्छत्ततिमिरं गोवित्थरेण हणंता महिमंडले पुढो पुढो विहरंति । अह सो वराहमिहिरमुणी अप्पमई चंदसूरपन्नत्तिपमुहे केवि गंथे मुणिऊण अहंकारविकारनडिओ सूरिपयमहिलसंतो अजुग्गु त्ति गुरूहिं नाणबलेण नाऊण न गणहरपए ठाविओ इय सुयवयणं सरंतेहिं । 'वूढो गणहरसद्दो, गोयममाईहि धीरपुरिसेहिं | जो तं ठवइ अपत्ते, जाणतो सो महापावो ||१|| तओ वराहमिहिरस्स जिट्ठसहोयरे वि सिरिभद्दबाहुगणहरे परमा अपीई जाया, जओ इमेहिं मह माणखंडणा कया, अओ इत्थ ठाउं न जुज्जइ । भणियं च-'माणि पणट्ठइ जइ न तणु तो देसडा चइज्ज | मा दुज्जणकरपल्लविहिं
