________________
गच्छाचारपइण्णयं
१७८
इमो अन्नो ।। ९ ।। एवं चउग्गईए, परिब्भमंतस्स जीवकणगस्स । नामाई बहुविहाइं, जीवदव्वं तयं चेव ||१०|| जह कम्मयरो कम्मं, करेइ भुंजेइ सो फलं तस्स । तह जीवो वि अ कम्मं, करेइ भुंजेइ तस्स फलं ।।११।। उज्जोवेउं दिवसं, जह सूरो वच्चई पुणो अत्थं । नय दीसइ सो सूरो, अन्नं खित्तं पयासंतो ||१२|| जंह सूरो तह जीवो, भवंतरं वच्चए पुणो अन्नं । तत्थवि सरीरमन्नं, खित्तं व रवी पयासेइ ।।१३।। फुल्लुप्पलकमलाणं, चंदणअगरूण सुरहिगंधीणं । घिप्पइ नासाइ गुणो, नय रूवं दीसए तेसिं ।।१४ || एवं नाणगुणेणं, घिप्पइ जीवो वि बुद्धिमंतेहिं । जह गंधो तह जीवो, न हु सक्खा कीरए भित्तुं ।।१५।। भंभामउद्दमद्दलपणवमकुंदाण संखसन्नाणं । सद्दुच्चिय सुव्वइ केवलु त्ति न हु दीसई रूवं ।।१६।। पच्चक्खं गहगहिओ, दीसइ पुरिसो न दीसइ पिसाओ । आगारेहि मुणिज्जइ, एवं जीवो वि देहठिओ ।।१७।। हसइ विरूसइ रूसइ, नच्चइ गाएइ रुयइ सुहदुक्खं । जीवो देहमइगओं, विविहपयारं पयंसेइ ।। १८ ।। जह आहारो भुत्तो, जिआण परिणमइ सत्तभेएहिं । वस १ सोणिय २ मंस ३ ट्ठिअ ४ मज्जा ५ तह मेय ६ सुक्केहिं ७ ।।१९।। एवं अट्ठविहं चिअ, जीवेण अणाइसहगयं कम्मं । जह कणग पाहाणे, अणाइसजोगनिप्फन्नं । | २० || जीवस्स य कम्मस्स य, अणाइमं चेव होइ संजोगो । सो वि उवाएण पुढो, कीरइ न बलाउ जह कणगं ||२१|| ज (इ)ह पुव्वयरं कम्मं, जीवो वा जइ हविज्ज वइ कोइ । सो वत्तव्यो कुक्कुड-अंडाणं भणसु को पढमो ।। २२ ।। जह अंडसंभवा कुक्कुडित्ति अंडं च कुक्कुडाइभवं । नय पुव्वावरभावो, जह तह कम्माण जीवाणं ।।२३।। अणुमाणपहे सिद्धं, छउमत्थाणं जिणाण पच्चक्खं । गिण्हसु गणहर ! जीवं, अणाइयं अक्खयसरूवं ।।२४।। कत्थ य जीवो बलिओ, कत्थ य कम्माइ हुंति बलियाई । जीवस्स य कम्मस्स य, पुव्वनिबद्धाइ वेराई ।। २५ ।। इति जीवस्थापनकुलकम् ।।
