________________
१०१
गच्छाचारपइण्णयं अणायारं पसंसित्ता णं तमेव च उच्छप्पिज्जा, जहा-सुमइणा उच्छप्पियंन भवंति एए कुसीले, अहा णं एए वि कुसीले तो इत्थ जगे न कोवि सुसीलो अत्थि, निच्छियं मए एएहिं समं पव्वज्जा कायव्वा, तहा जारिसो तुमं निब्बुद्धिओ सो वि तित्थयरो त्ति, एवमुच्चारेमाणेणं से णं गोयमा ! महंतंपि तवमणुढेमाणे परमाहम्मियासुरेसु उववज्जिज्जा । से भयवं ! परमाहम्मियासुरदेवाणं उबट्टे समाणे सुमई कहं उववज्जिज्जा ? गोयमा! तेणं मंदभग्गेणं अणायारपसंसुच्छप्पणं करेमाणेणं सम्मग्गपणासणं अभिनंदियं तक्कम्मदोसेण अणंतसंसारियत्तणं अज्जियंतो कित्तिए अवाए तस्स साहेज्जा ? जस्स णं १अणंतपुग्गलपरियट्टेसु वि नत्थि चउगइसंसाराओ अवसाणं ति, तहा वि संखेवओ सुणसु-गोयमा ! इणमेव जंबुद्दीवं परिखिविऊणं ठिए जे एस लवणजलही, एयस्स णं जं थामं सिंधुमहानईपविठ्ठा तप्पएसाओ दाहिणेणं दिसाभागेणं पणपण्णाए जोयणेसुं वेइयाए मज्झंतरं अत्थि पडिसंतावदायगं नाम अद्धतेरसजोयणपमाणं हत्यिकुंभागारं थलं । तस्स य लवणजलोवरेणं अटुट्ठजोयणाणि उस्सेहो। तहिं च णं अच्चंतघोरतिमिसंधयाराओ घडियालगसंठाणाओ सीयालीसं गुहाओ, तासुं च णं जुणं जुगं निरन्तरे जलयारिणो मणुया परिवसंति । ते य वज्जरिसहनारायसंघयणे महाबलपरक्कमे अद्धत्तेरसरयणी पमाणेणं संखिज्जवासाऊ महुमज्जमंसप्पिए सहावओ इथिलोले परमदुवन्नसुउमालअणिद्धखरफरुसियतणू मायंगवइकयमुहे सीहघोरदिट्ठी कयंतभीसणे अदावियपिट्ठी असणिव्वनिठुरपहारी दप्पुद्धरे य भवंति । तेसिं जाओ अंतरंडगोलियाओ ताओ गहाय चमरीणं संतिएहिं सेअपुच्छवालेहिं गुंथिऊणं जे केइ उभयकन्नेसु निबंधिऊणं महग्घुत्तमजच्चरयणत्थी सागरमणुपविसिज्जा | से णं जलहत्थिमहिसगाहगमगरमहामच्छतंतुसुंसुमारपभिईएहिं दुट्ठसावरहिं अमेसिए चेव सव्वंपि सागरजलं आहिंडिऊण जहिच्छाए जच्चरयणसंगहं करिय अहयसरीरे आगच्छिज्जा । ताणं च अंतरंड
