Page Text
________________
नायाथम्मकहाओ
[ III. 51
विहरइ । तए णं तसं सत्थबाहदार गाणं अन्नया कयाई पुव्वरत्तावरत्तकालसमयंसि जिमियभुत्तत्तरागयाणं समाणाणं आयन्ताणं चोक्खाणं परमसुइभूयाणं सुहासणवरगयाणं इमेयारूवे मिहोक हासमुल्लावे समुप्पज्जित्था - सेयं खलु अम्हं देवाणुप्पिया ! कलं जाव जलते विपुलं असणं ४ उवक्खडावेत्ता तं विपुलं असणं ४ धूवपुप्फगंधवत्थं गहाय देवदत्ताय गणियाए सद्धिं भूमिभागस्स उज्जाणसिरिं पच्चणुब्भवमाणाणं विहरित्तर तिकट्टु अन्नमन्नस्स एयमट्टं पडिसुर्णेति २ कलं पीउप्पभायाए कोडुंबिय पुरिसे सद्दावेंति २ एवं वयासी - गच्छह णं देवाणुप्पिया ! विपुलं असणं उवक्खंडावेह २ तं विपुलं असणं ४ धूव पुष्कं गहाय जेणेव सुभूमिभागे उज्जाणे जेणेव नंदापुक्खरिणी तेणामेव उवागच्छह २ नंदाए पोक्खरिणीए अदूरसामंते थूणामंडवं आहणह २ आसियसम्मज्जिओवलित्तं सुगंध जाव कलियं करेह २ अम्हं पडिवालेमाणा २ चिट्ठह जाव चिट्ठेति । तए णं ते सत्थवाहदारगा दोच्चपि कोडुंबियपुरिसे सद्दार्वेति २ एवं वयासी – खिप्पामेव लहुकरणजुत्तजोइयं समखुरवालिहाणं समलिहियतिक्खग्गसिंगएहिं रययामयघंटसुत्तरज्जुपवर कं चणखचियनत्थपग्गहोवग्गहिएहिं नीलुप्पलकयामेलएहिं पवरगोणजुवाणएहिं नानामणिरयणकंचणघंटियाजालपरिक्खित्तं पवरलक्खणोववेयं जुत्तामेव पवहणं उवणेह । ते वि तहव उवर्णेति । तए णं ते सत्थवाहदारगा व्हाया जाव सरीरा पवहणं दुरूहंति २ जेणेव देवदत्ताए गणियाए गिहे तेणेव उवागच्छंति २ पवहणाओ पच्चोरुहंति २ देवदत्ताए गणियाए गिहं अणुप्पविसंति । तए णं सा देवदत्ता गणिया ते सत्थवाहदारए एज्जमाणे पासइ २ तुट्ठा आसणाओ अब्भुट्ठेइ २ सत्तट्ठ पयाई अणुगच्छइ २ ते सत्थवाहदारए एवं वयासी - संदिसंतु णं देवाणुप्पिया ! किमिहागमणप्पओयणं । तए णं ते सत्थवाहदारगा देवदत्तं गणियं एवं वयासी - इच्छामो णं देवाणुप्पिए ! तुब्भेहिं सार्द्धं सुभूमिभागस्स उज्जाणसिरिं पच्चणुब्भवमाणा विहरित्तए । तए णं सा देवदत्ता तेसिं सत्थवाहदारगाणं एयमहं पडिसुणेइ २ व्हाया कयबलिकम्मा किं ते पवर जाव सिरिसमाणवेसा
60
| SR No. | 022565 |
| Book Title | Nayadhamma Kahao |
| Original Sutra Author | N/A |
| Author | N V Vaidya |
| Publisher | N V Vaidya |
| Publication Year | 1940 |
| Total Pages | 254 |
| Language | Sanskrit |
| Classification | Book_Devnagari & agam_gyatadharmkatha |
| File Size | 20 MB |