________________
122 नायाधम्मकहाओ
{IX.85धरिमं च मेज्जं च पारिच्छेज्जं च जहा अरहन्नगस्स जाव लवणसमुहं बहूइं जोयणसयाई ओगाढा। _ (85) तए णं तसिं माकंदियदारगाणं अणेगाइं जोयणसयाई ओगाढाणं समाणाणं अणेगाई उप्पाइयसयाई पाउन्भूयाइं तंजहा - अकाले गजियं जाव थणियसद्दे कालियवाए तत्थ समुट्ठिए । तए णं सा नावा तेणं कालियवाएणं आहुणिज्जमाणी २ संचालिज्जमाणी २ संखोभिज्जमाणी २ सलिलतिक्खवेगेहिं अईवद्विज्जमाणी २ कोट्टिमंसि करतलाहए विव तिंदूसए तत्थेव २ ओवयमाणी य उप्पयमाणी य उप्पयमाणी विव धरणीयलाओ सिद्धविज्जा विज्जाहरकन्नगा ओवयमाणी विव गगणतलाओ भट्ठविज्जा विज्जाहरकन्नगा विपलायमाणी विव महागरुलवेगवित्तासिया भुयगवरकन्नगा धावमाणी विव महाजणरसियसहवित्तत्था ठाणभट्ठा आसकिसोरी निगुंजमाणी विव गुरुजणदिट्ठावराहा सुजणकुलकन्नगा घुम्ममाणी विव वीचिपहारसयतालिया गलियलंबणा विव गगणतलाओ रोयमाणी विव सलिलभिन्नगंठिविप्पइरमाणथोरंसुवाएहिं नववहू उवरयभत्तुया विलवमाणी विव परचक्करायाभिरोहिया परममहब्भयाभिद्दया महापुरवरी झायमाणी विव कवडच्छोमणपओगजुत्ता जोगपरिव्वाइया नीससमाणी विव महाकंतारविणिग्गयपरिस्संता पारणयवया अम्मया सोयमाणी विव तवचरणखीणपरिभोगा चवणकाले देववरवहू संचुण्णियकट्ठकूवरा भग्गमेढिमोडियसहस्समाला सूलाइयवंकपरिमासा फलहंतरतडतडेंतफुटुंतसंधिवियलंतलोहखीलिया सव्वंगवियंभिया परिसडियरज्जुविसरंतसव्वगत्ता आमगमल्लगभूया अकयपुण्णजणमणोरहो विव चिंतिज्जमाणगुरुई हाहाकयकण्णधारनौवियवाणियगजणकम्मकरविलविया नाणाविहरयणपणियसंपुण्णा बहूहिँ पुरिससएहिं रोयमाणेहिं कंदमाणेहिं सोयमाणेहिं तिप्पमाणेहिं विलवमाणेहिं एगं महं अंतोजलगयं गिरिसिहरमासाइत्ता संभग्गकूवतोरणा मोडियज्झयदंडा वलयसयखंडिया कडकडेस्स तत्थेव विहवं उवगया । तए णं तीए नावाए भिज्जमाणीए ते बहवे पुरिसा विपुलपणियभंडमायाए अंतोजलंमि निर्मज्जावि यावि होत्था ।
