________________
બત્રીશી-૧૯, લેખાંક-૧૦૫
૧૧૩૯ તીવ્ર હોય, તો એનાથી પણ પુણ્યાનુબંધી પુણ્ય બંધાય છે. છતાં એ ગૌણ છે. ને તેથી, સાધકે તો ઉક્ત પ્રણિધાન માટે જ ઉદ્યમશીલ બનવું જોઈએ.
(૨) નિરનુબંધ પુણ્યઃ ગતાનુગતિક રીતે, શૂન્ય મનસ્કપણે, શુભપ્રણિધાન શૂન્ય રીતે જે શુભક્રિયા કરવામાં આવે તેનાથી નિરનુબંધ પુણ્ય બંધાય છે. એમ આરાધના પ્રત્યે સામાન્ય આદર કે શુભપ્રણિધાન હોવા સાથે સામાન્ય અવિધિ હોય તો પણ નિરનુબંધ પુણ્ય બંધાય છે. શુભપ્રણિધાનપૂર્વકની શુભક્રિયાથી પુણ્યાનુબંધી પુણ્ય બાંધ્યા બાદ જો એનો પશ્ચાત્તાપ કરે તો પ્રથમ નંબરે પુણ્ય જ નાશ પામી જાય છે. પણ જો પુણ્ય નિકાચિત થઈ ગયું હોય તો પુણ્ય ઊભું જ રહે છે, પણ શુભાનુબંધો ખસી જાય છે ને નિરનુબંધતા ઊભી થાય છે. પસ્તાવો જો વધારે આગળ વધે, તો પછી પુણ્ય પાપાનુબંધી પણ થઈ જાય છે. જેમ કે મમ્મણને...
(૩) પાપાનુબંધી પુણ્યઃ ઈર્ષ્યાનું, પ્રશંસા વગેરેનું કે વિષયકષાયનું તીવ્રપ્રણિધાન હોય, ને આરાધનાકાળે પ્રભુ ભક્તિ, જયણા, ક્ષમા વગેરે શુભોપયોગ હોય તો પાપાનુબંધી પુણ્ય બંધાય છે. નિરનુબંધ કે પુણ્યાનુબંધી પુણ્ય બાંધ્યા પછી મમ્મણની જેમ સુકૃતનો પશ્ચાત્તાપ કરવામાં આવે કે પાછળથી અશુભ પ્રણિધાન (જેમ કે નિયાણામાં) ભેળવવામાં આવે તો પણ એ પુણ્ય (નિકાચિત હોવાથી જો નાશ ન પામ્યું હોય તો) પાપાનુબંધી બની જાય છે. એટલે ઉલ્લાસમાં આવીને તપશ્ચર્યામાં જોડાઈ ગયા... પછી જરા કઠણાઈ અનુભવાય તો પણ-અરરર... એક સામટું પચ્ચખાણ ક્યાં લઈ લીધું ? વગેરે રૂપે પસ્તાવો ન કરવો. એ જ રીતે સારી ઉછામણી બોલ્યા બાદ પસ્તાવો ન કરવો. એમ શ્રી સંઘની સેવા વગેરે કાર્યમાં કે કોઈ ઉપધાન વગેરે જેવા અનુષ્ઠાન ઉલ્લાસથી શરુ કર્યા બાદ કલ્પના કરતાં તન-મન-ધનનો વધુ ભોગ આપવાનો અવસર આવે
