________________
मूलशुद्धिप्रकरणम्-द्वितीयो भागः पाडेइ मंदरं पि हु जो सहसा तेण तो जिणो वीरो । चक्काऽऽइद्धो व्व खणं भमाडिओ, तं पि संहरिउं ॥५८॥ जा न वि चलइ कहिपि वि ता कुद्धो वहविणिच्छियमईओ। ता णेयलोहमारेहिं निम्मियं मुयइ गुरुचक्कं ॥५९॥ चूरेइ मंदरं पि हु जं तं पडियं जिणिदसीसम्म । थाणु व्व तेण खुत्तो जाणुपमाणं धरणिवढे ॥६०॥ तेणाऽवि य जा न मओ अणुकूलं ता करेइ उवसग्गं । विउरुव्वइ छप्पि उऊ समकालं तत्थ अवयरिए ॥६१।।
आणेवि देविनिवहं सिंगारागारचारुवेसधरं । पंचप्पयारविसयाण साहणं कुणइ सव्वं पि ॥६२॥ ताव य सुरविलयाहिं विलासगुणघडणनिग्गया सहसा । जयगुरुणो कुसुमसर व्व पेसिया दिट्ठिविच्छोहा ॥६३॥ काए वि छेडिओ कुसुमसत्तभमेरोलिमुहलधम्मिल्लो। कुणइ व्व भुवणगुरुणो संगमसुहपत्थणाऽवणइं ॥६४॥ दढबंधं पि हु छोडेविकावि संजमइ पुणरवि कडिल्लं । सरलंगुलिविल्लहले विहुणइ करपल्लवे कावि ॥६५॥ कोमलमुणालवेल्लहलविब्भमिल्लाहिं बाहुलइयाहि । मयणरसनिब्भरंगी काविहु मोट्टाइयं कुणइ ॥६६॥ ल्हसिओउवरिल्लअंसुयसंठवणमिसेण कावि दंसेइ । उत्तुंगनिबिडचक्कलमणोहरं थोरथणवढे ॥६७॥ कावि वियंभइ कावि हु पुलइज्जइ कावि वेवइ सयण्हं । दीहुण्हमुक्कनीसासनिब्भरं कावि नीससइ ॥६८|| इय एवमाइबहुविहवियाखसनिब्भराओ देवीओ । अक्खुभियं दणं एवं जंपंति जिणइंदं ॥६९॥ 'सामिय ! कुण कारुण्णं दीणाणम्हाण कामतवियाई । अंगाई निययसंगमअभयरसेणं समोल्हवसु ॥७०॥
१. ला. तेण वि य जाव न मओ ॥ २. ला. 'मरालि ॥
