________________
मूलशुद्धिप्रकरणम्-द्वितीयो भाग:
२८३
तो पंचनमोक्कारं भणिय सुभद्दा उ तिन्नि वाराओ । अच्छोडइ चालणिसंठिएण नीरेण सा सहसा ॥४९॥ ता महया कुंचारवसद्देण समुग्घडंति अररीणि । तो दुंदुहीउ तुरियं पहयाओ सुरा-ऽसुर-नरेहिं ॥५०॥ निवडइ य कुसुमवुट्ठी तदुवरि गयणाउ तियसपम्मुक्का । 'जय बंभाणि ! महासइ !' इय जयसद्दो समुछेलइ ॥५१॥ 'तं धण्णा कयपुण्णा तुज्झ सुलद्धं च माणुसं जम्मं । जं तियसवण्णणिज्जं अक्खलियं धरसि वरसीलं' ॥५२॥ इय एवं थुव्वंती दाहिण-पच्छिमपओलिदाराई । उग्घाडिऊण वच्चइ उत्तरपासत्थियं पउलि ॥५३॥ तीए ये कवाडाइं अच्छोडित्ता जलेण तो भणइ । 'जा मह सरिसी का वि हु उग्घाडिज्जा उ सा एए' ॥५४॥ अज्ज वि तहेव चिट्ठइ तं दारं तीए चंपनयरीए । सा वि हु अणुगम्मंती असेसपुरनायरजणेणं ॥५५॥ वणिज्जंती सयणाइएहिं भट्टेहिं तह पढिज्जंती । नारीयणमंगलसद्दसंथुया जाइ जिणभवणे ॥५६॥ तत्थ वि 'नमो जिणाणं' भणमाणी चेइयाण सा पूयं । काऊण पुणो वंदइ जाइ तओ गुरुसमीवम्मि ॥५७॥ दाऊण य वंदणयं गुरूण भत्तीए बारसावत्तं ।। वंदित्तु समणसंघं नियघरहुत्तं तओ चलिया ॥५८॥ दीणा-ऽणाहाईणं वियरंती इच्छियं महादाणं । जिणसासणमाहप्पं एवं एयं पयंपंती ॥५९॥ संपत्ता नियभवणे पणमित्ता जंति नरवंराईया । नियनियठाणेसु तओ पई वि परमेण विणएण ॥६०॥ जंपइ 'खमसु महासइ ! मज्झ पिए ! जं अणज्जवयणेहिं ।
परिभूयाऽसि मणागं, सुरमहिए ! सुदढसम्मत्ते' ॥६१॥ १. ला. च्छलिओ ॥ २. ला. वि ॥ ३. ला. एसा ॥
