________________
२६८
मूलशुद्धिप्रकरणम्-द्वितीयो भागः तेण वि भणियं 'सामिय ! खणं पि एयं चएमि नो मोत्तुं' । सेट्ठी वि भणइ "भद्दय ! जइ एवं गिण्ह तो सव्वं ॥१०॥ जेण इमाओ जायइ कल्लाणं एत्थ अण्णजम्मे वि" ।
इय भणिओ सो तुट्ठो पढइ असेसं पि नवकारं ॥११॥ -...
एवं च तस्स पंचनमोक्कारपरावत्तपरायणस्स वच्चंति जाव केइ दिवसा ताव समागओ पाउससमओ । तत्थ य कलिकालि व्व आपूरियं अंबरतलं मिच्छादंसणपडलेहि अइकसिणबहलेहिं जीवसरूवं व तमालकालजलयनिवहेहिं, जलियकोवानलपसारियगरुयजालाहि व समंतओ विप्फुरियं सोयामणिलयाहिं, अयंडकुवियपयंडखलयणविसंखलु च्छलियपेसुन्नयरवो व्व उल्लसिओ गज्जियरवो, दुत्थियजीवसंघाय व्व विरडंति दडुरसंघाया, मलिणजणुण्णइदंसणदूमिया सुयण व्व पणस्संति रायहंसा, खलाणं व पयइमलिणाणं बरहीणवियंभिओ कवडेण व कोमलो केयारखो, रणरोसुब्भडसुहड ब्व जलया मुंचंति धारानिवहं, कुलडाउ व्व उभयकूलपाडणपराओ अंतो कलुसाओ कुडिलगइगमणाओ नीयाणुव्वत्तिणीओ पलोट्टाओ सरियाओ।
उब्मिन्ननवतणंकुरनिरंतरं इंदगोवयाइण्णं । वेरुलियगब्भमरगयघडियं पिव जत्थ भूवीढं ॥१२॥ गहिउग्गविज्जुदंडो कालो कालो व्व जत्थ घणनिवहो । मारेइ विरहिणीओ गज्जंतो गरुयसद्देणं ॥१३॥ नूमइ सूरो सूरो व्व जत्थ लज्जाए अत्तणो रूवं । पेच्छंतस्स वि निहया जं नलिणिपिया जडेणावि ॥१४॥
एवंविहे य पाउससमए सो सुभगो महिसीओ गहाय गओ अडवीए । पुणो वियालवेलाए पयट्टो सगिहाभिमुहं । अवंतरालेय पूरेण समागया महानई दिट्ठा सुभगेण । तओ तं पासिय मणागं भयभीओ । एत्थंतरम्मि य अद्धपविट्ठाओ परकूले अन्नखेत्तम्मि महिसीओ । तओ नवकारं पढंतेण दिण्णा झड त्ति झंपा, नईए । तत्थ य कद्दममज्झखुत्तेणं अदिस्समाणेणं खइरकट्ठखोडीखीलएणं विद्धो हिययप्पएसे । पंचनमोक्कारपरावत्तणपरायणो य मम्मप्पहारेणं गओ पंचत्तं । उप्पण्णो तीए चेव नियसामिसालउसभदाससेट्ठिधरिणीए अरिहदासीए कुच्छिसि पुत्तत्ताए । जाओ य तीए दोसु मासेसु विइक्वतेसु डोहलो, अवि य
१. ला. दियहा ॥
