________________
२१८
मूलशुद्धिप्रकरणम्-द्वितीयो भागः उद्दिसिउं ते कुमरे अह अक्खाओ मए दयामूलो । धम्मो सिवसुहफलओ अचिंतचिंतामणिसरिच्छो ॥११७॥ सो पुण खंतिविसुद्धो मद्दवजुत्तो तहज्जवसमेओ । मुत्तीए संपण्णो तवसहिओ संजमगुणडो ॥११८॥ कयसच्चव्वयसारो सोयसमेओ अकिंचणाइण्णो । नवबंभगुत्तिगुत्तो विसुद्धबंभव्वयजुओ य ॥११९॥ चारित्त-नाण-दसणसुविसुद्धगुणंकिओ परमतत्तो । गयकोह-माण-माओ निल्लोहो निम्ममो असढो ॥१२०॥ राग-दोसविमुक्को मोहविहीणो अमच्छरो अमलो । राईभोयणरहिओ अविरहिओ चरणकरणेहिं ॥१२१॥ इय एवमाइधम्मं जईण संबंधि सावयाणं च । सोऊणं छ प्पि जणा संवेगगया इमं आह ॥१२२।। 'कयकरयलंजलिउडा सहरिसरोमंचकंचुयसरीरा । भयवं ! मायापियरं आपुच्छेउं ततो अम्हे ॥१२३।। सव्वमिमं आएसं काहामो तुम्ह सीसभावेण । संसारभउव्विग्गा मोक्खत्थं सव्वदुक्खाण' ॥१२४॥ इय भणिउं नमिऊण य तम्मि पुरे नियगिहम्मि गंतूणं । नमिउं माया-पियरं भणंति सव्वे इमं वयणं ॥१२५।। 'संसारसागराओ भीया जर-मरणवाहिनीराओ । नायं च तदुत्तरणं इच्छामो जइ विसज्जेह ॥१२६।। भयवंतसासणम्मी सव्वे वि हु सव्वदुक्खदलणम्मी । होहामो भवभीया सुद्धमणा निम्ममा समणा' ॥१२७॥ जणयाइ इमं सुणिउं वज्जासणिनिट्ठरं दुसहवयणं । भूमीए निवडियाई जाओ हाहारवो सयणे ॥१२८॥ बत्तीसं बत्तीसं तेसिं भज्जाउ सयणवग्गो य ।
अकंदिउं पवत्तो कुररीण कुलं व दीणमणो ॥१२९॥ १. सं.वा.सु. र इमं व ॥
