________________
१२८
मूलशुद्धिप्रकरणम्-द्वितीयो भागः
भावार्थस्तु कथानकगम्यस्तच्चेदम् -
[४० नूपुरपण्डिताकथानकम्] अत्थिभरहद्धवासे जंबुद्दीवम्मि सयलगुणकलियं । नामेण वसंतपुरं नयरं तेलोक्कविक्खायं ॥१॥ तत्थाऽरिमयाहिवसप्पमाणगुरुदप्पदलणवणसरहो । पसरंतकित्तिसरिपूरगिरिवरो रायजियसत्तू ॥२॥ तस्स पडिवक्खतारातेओहावणपसिद्धमाहप्पा । ससिचंदिम व्व पयडा अत्थि पिया धारिणी नाम ॥३॥ तत्थ य नयरे सेट्टी नामेणं अत्थि देवदत्तो त्ति । तस्स य धूया पवरा विसिट्ठलावण्णरूवधरा ॥४॥ जीए य रूवजोव्वणसोहग्गोहामियाओ पुहईए । मण्णे सुरंगणाओ पच्चक्खं नेय वियरंति ॥५॥ सेट्ठी कुमारनंदी तीए नयरीए वसइ अण्णो वि । तस्सऽत्थि वरो पुत्तो, नामेणं पंचनंदि त्ति ॥६॥ सा तेणं परिणीया महाविभूईए लोगपच्चक्खं । तीए य समं भुंजइ भोए अच्चतमणुरत्तो ॥७॥ अह अण्णया कयाई, पहाणत्थं सा नई गया बाला । तं मज्जंतं दटुं अह एगो चिंतइ जुवाणो ॥८॥ कामकरिकुंभविब्भमचक्कलउत्तुंगथोरथणवढे । जो रमइ इमीए नरो सो च्चिय इह जियइ जियलोगे ॥९। कोमलमुणालविल्लहलसरलबाहाहिं देइ जस्सेसा । कंठम्मि पासयं सो एक्कोच्चिय धण्णओ एत्थ ॥१०॥ जो परिणयबिंबाफलसमाणअहरामयं पियइ पुरिसो। एईए सइच्छाए सहलं मणुयत्तणं तस्स ॥११॥ किं बहुणा ? सव्वंगं अवगूढो जो इमीए सुरयरसं । भुंजइ तेणित्थ जए पत्तं तेलोक्कसव्वस्सं ॥१२॥
१. ला. 'बाहल' ||
