Page Text
________________
अहवा वच्चउ अत्थो, विज्जुज्जोउ व्व चंचलसहावो । अनिमित्तमेव सयणा वि, कीस विवरंमुहीया ॥ २५८७॥ हुं नायं सयणा वि हु, धणभंगे कज्जसिद्धिविरहेण । दंसिंति कह वरागा, पणयं मइ रोरतुल्लम्मि
॥ २५८८॥ ताव च्चिय सयणा बंधवा य, मित्ता य होंति मणुयस्स । जाव न मुच्चइ कुवलय-दलदीहाच्छीए लच्छीए।। २५८९ ॥ धणवज्जियस्स य ममं, एत्तोऽवत्थाणमेत्थ नो जुत्तं । परमा विडंबणा का वि, पुव्वकमखंडणा जेण ॥ २५९०॥ इइ चिंतिऊण तेणं, कहिओ खेमिलगनामधेयस्स । मित्तस्सऽण्णत्थगमा-ऽभिलासरूवो सवुत्तंतो
॥ २५९१॥ मित्तेण जंपियं जुत्त-मेव देसंतरम्मि तुह गमणं । नवरं अहं पि तुमए, समगं चिय आगमिस्सामि
॥ २५९२ ॥ तो दो वि नियपुराओ, विणिक्खमित्ता सुवण्णभूमीए। ते सिग्घगईए गया, पारद्धा तत्थ य उवाया
॥ २५९३ ॥ अत्थोवज्जणकज्जेण-ऽणेगसो अह कहं पि विहिवसओ। खेत्ताऽणुभावओ विय, उवज्जियं केत्तियं पि धणं ॥२५९४ ॥ तेण य धणेण रयणाई, अट्ठ गहियाइं पवरमुल्लाइं । सुमरिय गिहाय तत्तो, विणियत्ता नियपुराऽभिमुहं
॥ २५९५ ॥ इंताण य अद्धपहे, अइपबलत्तेण लोहपसरस्स । खेमिलगस्स पयट्टा, समत्थरयणग्गहणवंछा
॥ २५९६॥ कह वंचिस्सामि इमं, कह व गहिस्सामि सव्वरयणाई । अणवरयमेगचित्तो, चितिउमेवं समाढत्तो
॥ २५९७॥ अह एगम्मि दिणम्मि, गामस्संऽतो गयम्मि वइरम्मि । रयणऽट्ठयगंठिसमा, अंतो पक्खित्तलेठुदला ॥ २५९८॥ रइया अवरा गंठी, वइरस्स इमं समप्पइत्ताणं । रयणीए वच्चिस्सं, इति चिन्तेऊण पाविट्ठो
॥ २५९९ ॥ सो जाव गंठिजुयलं, संजमइ ससंभमं लहुं ताव । वइरो समागतो भणइ, मित्त ! किं कुणसि तुममेयं ॥ २६००॥ किं दिट्ठोऽहमऽणेणं ति, संकिएणाऽवि नियडिनिउणेण । तेणं पयंपियं मित्त !, कुडिलरूवा हि कम्मगई ॥ २६०१॥ सच्छंदविलसियाई, विहिस्स चिंतापहे वि न पडंति । जं सुमिणे वि न दीसइ, तं पिबला कज्जमाऽऽवडइ ॥ २६०२॥ एवं विभाविऊणं, कयं मए रयणगंठिजुयलमिमं । मा एगट्ठाणठियं, पणस्सिही कहवि हत्थाओ
॥ २६०३॥ ता नियरयणचउक्कस्स, गंठिमेगं तुमं धरसु हत्थे। अवरं च अहं धारेमि, होउ दढरक्खणा एवं
॥ २६०४॥ इति संसिऊण-सम्मोहमूढहियएण वइरहत्थम्मि। साररयणाण गंठी, बद्धा इयरा य नियगकरे
॥ २६०५॥ तो तत्थेव पसुत्ता, संपत्ते कहवि मज्झरत्तम्मि। तं लेढुगंठिमाऽऽदाय, खेमिलो निग्गओ तुरियं
॥ २६०६ ॥ गंतुं जोयणसत्तग-मुच्छोडइ जाव तं रयणगंठिं। ता पेच्छइ पुव्वनिहित्त-लेठसयलाई से अंतो
॥ २६०७॥ हा असिवत्तुक्कत्तिय-सच्छंदुद्दामविलसियसहाव!। पावविहि! किमिव तुमए, मम चिंतियमऽण्णहा विहियं ॥२६०८ ॥ हंदि पुव्वभवुब्भूय-भूरिपावस्स दुक्खदाइत्तं । मित्तवियोगत्थकयं, फलजणगत्तेण निव्वडियं
॥ २६०९॥ मण्णे सुद्धसहावस्स, तस्स मित्तस्स वंचणाजणियं । पावं इह जम्मे च्चिय, उवट्ठियं पत्तपागं व
॥ २६१०॥ एवं समुल्लवन्तो, सोगमहाभरसमोत्थयसरीरो । संजमिओ इव वज्जा-हउ व्व ठाऊण खणमेक्वं
॥ २६११॥ अच्चंतछुहाऽभिहओ, मग्गपरिस्समकिलामिओ बाढं । भिक्खं भमिउमऽसत्तो, गिहम्मि एगम्मि य पविट्ठो ॥२६१२ ।। भणिया तग्गिहविलया, अम्मो ! मे देहि भोयणं किंपि। आसऽग्गलाए, खलियं, जावऽज्ज वि जाइ नो जीयं ॥२६१३ ॥ तद्दीणवयणसवणुब्भवंत-करुणाए तीए सप्पणयं । आरद्धं दाउं नवर-माऽऽगओ झत्ति गिहनाहो
॥ २६१४ ॥ सो तं च पजेमंतं, पेक्खिय रोसाऽरुणच्छिविच्छोहो । आ पावे ! मइ गेहाउ, निग्गए पोससि विडे तं
॥ २६१५ ॥ इय निब्भच्छिय गिहिणि, खेमिलमुवणेइ रायपुरिसाण । एसो अकज्जकारित्ति, तेर्सि पुरतो निवेइत्ता
॥ २६१६ ॥ भयकंपंतसरीरो, विच्छायमुहो य सो तओ तेहिं । कहिओ जारो त्ति निवस्स, तेण वज्झो य आणत्तो
॥ २६१७॥ तो विरसमाऽऽरसंतो, सो नीओ तेहिं वज्झठाणम्मि। भणितो य इट्ठदेवय-मऽणुसुमरसु रे! तुममियाणि ॥ २६१८॥ भयवसविसंठुलंऽतक्ख-राए वाणीए किपि जपतो। उल्लंबिउंविमुक्को, दीहररज्जूए रुक्खम्मि
॥ २६१९ ॥ अह जावज्जऽवि नीहरइ, नेव जीयं कहपि तुडिजोगा। ता उल्लंबणरज्जू, तुट्टा पडिओ य सो झत्ति
॥ २६२० ॥ सिसिरवणमारुएणं, मणागमाऽऽसासिओ खणद्धेण । मरणमहाभयविहुरो, ठाणाउ तओ लहुं चलिओ ।। २६२१ ॥ जाव य केत्तियमेत्तं पि, भूमिभागं स जाइ वेगेण । ताव तमालमहातरु-तलम्मि पेच्छइ मुणि एगं
॥ २६२२ ॥
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |