Page Text
________________
स
जइ तुममिह पडिबन्धं, हुंतं थेवंपि ता न इयकालं । होज्ज महदुक्खजालं, किं न सुयमिमं तए चित्त ! ॥ १९६८॥ एगदिवसं पि जीवो, पव्वज्जमुवागओ अण्णण्णमणो । जइ वि न पावइ मोक्खं, अवस्सं वेमाणिओ होइ । ॥ १९६९ ॥ अहवेगदिवसमिच्चाइ-थूलं माणं जओ मुहुत्ते वि। सण्णाणपरिणईए उ, फलमिटु होइ जमिहत्तं
॥ १९७० ॥ जं अण्णाणी कम्मं, खवेइ बहुयाहिं वासकोडीहिं । तं नाणी तिहिं गुत्तो, खवेइ ऊसासमेत्तेण
॥ १९७१ ॥ कहमिहरा मरुदेवी, पुव्वं अगुणा वि तक्खणा चेव। सिद्धा तुमं तु हे मण!, सुनाणपरिणइगुणविहीण ! ॥ १९७२ ॥ कइया वि रागरतं कइयवि दोसेण कलुसियसरूवं । कइया वि मोहमूढं, कया वि कोहग्गिसंतत्तं
॥ १९७३ ॥ कइयावि माणथद्धं, कयाइ मायाए बाढमाऽऽविद्धं । कइया वि महालोहोयहिम्मि सव्वंगनिम्मग्गं
॥ १९७४ ॥ कइया वि वेरमच्छर-रणरणयभयट्टरोद्दझाणगयं । कइया विदव्वत्ताऽऽइ-विसयचिन्ताभरक्कन्तं
॥ १९७५ ॥ निच्चं पि वावडं चिय, खरपवणपणुण्णधयवडो व्व तुमं। नाऽवत्थाणं थेवं पि, लहसि कइया वि परमत्थे ॥ १९७६ ॥ इच्चाइ चित्त ! केत्तिय-मऽणुसासिज्जसि तुमं सयं चेव । कुसलाऽकुसलविभागं, परिभावसु तह य निच्छयसु ॥ १९७७ ॥ तत्तो कुसलपवित्ति, निच्चं कुसलट्ठिएसु बहुमाणं । कुणसु अकुसलाऽकुसलत्थ-चायमज्झत्थभावे य ॥ १९७८ ॥ एवमऽकुसलविवज्जण-कुसलपवित्तिप्पहाणकारणओ। कज्ज पि मण! समाही-रूवं परमं चिय लहेसि ॥ १९७९॥ इय जो निच्चं पि मणो, अणुसासइ भावसारमऽणुसमयं । समयं मायं कोहं लोहं, च जिणेज्ज कि चोज्जं ॥ १९८०॥ इहरा अणप्पकुविकप्प-कप्पणाऽऽसत्तचित्तवेलविओ। हियमवि अहियं सयणं पि, परजणं मित्तमवि सत्तुं ॥ १९८१ ॥ सब्भूयमऽसब्भूयं पि, मण्णमाणो करि व्व दुव्वारो। किं किं न पावठाणं, वसुदत्तो इव करेज्ज जणो ॥ १९८२ ॥ तहाहिउज्जेणीए पुरीए, नरवइणो सूरतेयनामस्स । सोमप्पहो त्ति नामं, आसी उवरोहिओ विप्पो
॥१९८३ ॥ नीसेससत्थपरमत्थ-जाणगो सव्वदरिसणविहण्णू । अच्चन्तवल्लहो गुणि-जणस्स रण्णो य सुगुणो त्ति ॥ १९८४॥ एगम्मि य पत्थावे, दिवं गओ सो तओ य से पुत्तो । वसुदत्तो नामेणं, तप्पयविनिवेसणट्ठाए
॥ १९८५ ॥ सयणेहिं दंसिओ नरवइस्स, नवरं लहु त्ति अपढो त्ति । पडिसिद्धो रण्णा सो, अण्णो य निवेसिओ तत्थ
॥ १९८६ ॥ परिभूयं अप्पाणं, मण्णंतो गुरुविसायसंतत्तो । वसुदत्तो नीहरिओ, पढणऽत्थं तयणु गेहाओ
॥ १९८७॥ पवरं विज्जाखेत्तं, नाणाविहविउससंगयं सोच्चा। पाडलिपुत्तं लोयाओ, तत्थ गन्तुं समारतो
॥ १९८८॥ कालक्कमेण पत्तो, पढियाओ तहिं च सव्वविज्जाओ। अह सिद्धवंछियऽत्थो, समागतो निययनयरम्मि ॥ १९८९॥ तुट्ठो विज्जाए निवो, दिण्णा पिउसंतिया य से भुत्ती । जाओ य सम्मओ राय-पउरलोयस्स सव्वस्स
॥ १९९०॥ नरवइसम्माणेणं, इस्सरिएणं च सुयमएणाऽवि। तिणमिव जयं नियन्तो, कालं वोलेइ सो तत्थ
॥ १९९१॥ इस्सरियाऽऽइलवेण वि, तरलिज्जइ माणसं अधीराणं । किं पुण कुलबलविज्जाऽऽइ-याण सव्वेसिं समवाए १९९२ ॥ अवि तीरिज्जइ जुगविगम-जलहिकल्लोलपडलमऽवि खलिउं। इस्सरियाऽऽइमहामय-विवसं तु मणो न थेवं पि ॥ १९९३ ।। इय सो उम्मत्तमणो, एगम्मि दिणे नडाण पेच्छणयं । कोऊहलेणं दटुं, निसिम्मि मित्तेहिं संलत्तो
॥१९९४ ॥ हे मित्त ! एहि जामो, नडपेच्छणयं खणं पलोएमो। दिट्ठी 8व्वपलोय-णेण सहलत्तणमुवेइ
॥ १९९५ ॥ तेसिं अणुवित्तीए, गओ तहिं सो ठिओ य खणमेक्कं । अह तत्थ तया जुवई, विडेण सह जंपिरी एवं
॥ १९९६ ॥ अलियविउसेण पइणा, निरुद्धपसराए संपयं मज्झ । तुह सुहय ! दंसणामऽय-लाभेणं निव्वुई जाया ॥ १९९७॥ हे पेच्छणगपयट्टग !, चिरकालं जीवियं हवउ तुज्झ । जेण कओ वक्खेवो, मह पइणो कोवजलनिहिणो ॥ १९९८॥ ता एहि सुहय ! जावेस, कूडविउसो इहेव जावेइ । ताव खणं कीलित्ता, नियनियगेहेसु वच्चामो
॥ १९९९ ॥ इय तीए पणयसारं, गिरमायण्णिय विचिन्तियं तेण । अलियवियप्पविगप्पण-पवणपणोल्लियमणेण इमं ॥ २०००॥ नूणं सा मे भज्जा, एसा परपुरिसमणुसरइ पावा । कूडविउसं च मण्णे, ममं च उद्दिस्स वागरइ
॥ २००१॥ पुव्वं पि दुट्ठसीला, लिंगेहि मए वियाणिया आसि । संपइ पच्चक्खं चिय, दिट्ठा ता निग्गहामि इमं .
॥ २००२ ॥
૫૯
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |