Page Text
________________
अकुसलमणनिरोहो, कुसलस्स उदीरणं च ते चेवं। आसज्ज जं किर भवे, एसो माणस्सिओ विणओ
॥ १५९९॥ आसणदाणाईओ पच्चक्खो, एस चेव गुरुविरहे। तक्कहियविहिपहाण-प्पवित्तिओ हवइ य परोक्खो ॥१६००॥ इय भूरिभेयभिण्णं, विणयं निउणं वियाणिउं धीरो । आराहणाऽभिलासी, सम्मं कुज्जा तयं जम्हा
॥१६०१ ॥ जो परिभवइ अविणया, धम्मगुरुं जत्थ सिक्खए विज्जं । सा सुगहिया वि विज्जा, दुक्खेणं तस्स देइ फलं ॥१६०२ ॥ किंचसव्वत्थ लभेज्ज नरो, वीसंभं पच्चयं च बुद्धि च । जइ गुरुजणोवइटुं, विणयं भावेण गिण्हेज्जा
॥१६०३॥ पव्वइयस्स गिहिस्स व, विणयं चेव कुसला पसंसंति । न हु पावइ अविणीओ, कित्तिं च जसं च लोयम्मि ॥१६०४॥ जाणंता वि य विणयं, केई कम्माऽणुभावदोसेण । नेच्छंति पउंजेउं, अभिभूया रागदोसेहि
॥ १६०५ ॥ विणओ सिरीण मूलं, विणओ मूलं समत्थसोक्खाणं । विणओ हु धम्ममूलं, विणओ कल्लाणमूलं ति ॥ १६०६॥ विणएण विहीणस्स, उ, सव्वं पि, निरत्थयं अणुट्ठाणं । तं चेव विणयसारं, सयलं सहलत्तणमुवेइ
॥१६०७॥ तह विणयविहीणम्मि, सिक्खा वि निरत्थिया भवे सव्वा । विणओ सिक्खाए फलं, विणयफलं सव्वपाहण्ण ॥१६०८॥ दोसा वि गुणा विणयाउ, होंति दोसा गुणा वि अविणीए । सज्जणजणमणरंजण-जणणी मेत्ती वि विणयाओ ॥१६०९॥ विणयपरम्मि गुरुत्तं, सम्मं दंसंति जणणिजणया वि। विणयविहीणे पुण ते वि, अहह ! सत्तुं विसेसेंति ॥१६१०॥ विणयोवयारकरणा, अदिस्सरूवा वि दिति दरिसावं । अविणयजणियाऽर्णक्खा, फिडंति पासट्ठिया वि लहं॥ १६११ ॥ पत्थरखरहियया दुकुहावि, विणयाउ पल्हयंति लहुं। नियवच्छदसणेण व, पसूयसुरहि व्व निब्भंतं ॥ १६१२ ।। विणयाओ विस्सासो, विणयाउ सयलअत्थसिद्धीओ। विणयाओ च्चिय फलदाइ-णीओ सव्वाओ विज्जाओ ॥ १६१३ ॥ अविणीयस्स पणस्सइ, जइ न पणस्सइ न जुज्जइ गुणेहिं । विज्जा सुसिक्खियावि हु, गुरुपरिभवबुद्धिदोसेणं ॥१६१४ ।। अविणीयस्स उ विज्जं, गुरू विदितो लहेज्ज वयणिज्जं । हारेज्ज सकजं पिहु, पावेज्ज ततो विणासं पि ॥१६१५ ॥ किंचविज्जा वि होइ बलिया, गहिया पुरिसेण विणयवंतेण । सुकुलपसूया कुलबा-लिय व्व पवरं पई पत्ता ॥ १६१६ ॥ संकमइ दुव्विणीए, गुरुपरिभवकारए य नो विज्जा। सेणियनिवे व्व तत्थेव, संकमज्जा उ विवरीए
॥ १६१७॥ तहाहिरायग्गिहम्मि नगरे, राया नामेण सेणिओ आसि । संमत्तथिरत्तपैहि व्व, सक्कविष्फारियपसंसो
॥ १६१८॥ सयलंतेउरपवरा !, देवी नामेण चेल्लणा तस्स । चउव्विहबुद्धिसमिद्धो, मंती पुत्तो य अभओ त्ति
॥१६१९॥ एगम्मि य पत्थावे, देवीए पत्थिवो इमं भणिओ। पासायमेगखंभं, मम जोग्गं कारवेसु त्ति।
॥ १६२० ॥ दुण्णिग्गहेण इत्थी-गहेण, संताविएण नरवइणा । पडिवण्णं तव्वयणं, अभयकुमारो य आइट्ठो
॥ १६२१ ॥ तो वड्ढइणा समगं, थंभनिमित्तं महाडवीए गओ। दिट्ठो तहिं च रुक्खो !, सुसिणिद्धो अइमहासाहो ॥ १६२२ ॥ अहिट्ठिओ सुरेणं, होहि त्ति विचित्तकुसुमधूवेहिं । अहिवासिओ स साही, कओववासेण अभयेण
॥१६२३॥ अह बुद्धिरंजिएणं, तरुवासिसुरेण निसिपसुत्तस्स। सिटुं अभयस्स महाणु-भाव! मा छिदिहिसि एवं ॥१६२४ ॥ वच्चसु तुमं पि सगिह, काहमहमेगखंभपासायं । सव्वोउयतरुफलफुल्ल-मणहराऽऽरामपरिकलियं
॥ १६२५ ॥ इय पडिसिद्धो अभओ, वड्ढइणा सह गओ सगेहम्मि। देवेण वि निम्मविओ, आरामसमेयपासाओ ॥ १६२६ ॥ तम्मि य देवीए समं, विचित्तकीलाहिं कीलमाणस्स । रइसागरावगाढस्स, राइणो जंति दियहाई
॥१६२७॥ अह तण्णयरनिवासिस्स, पाणवइणो कयाइ गब्भवसा । भज्जाए समुप्पण्णो, दोहलओ अंबगफलेसु ॥ १६२८ ॥ तो तम्मि अपुज्जंते, पइदियहं खिज्जमाणसव्वंगिं । तं दळूणं पुटुं, तेण पिए ! कारणं किमिह?
॥१६२९॥ परिपक्कंऽबयफलदोहलो य, तीए निवेइओ ताहे। पाणाऽहिवेण भणियं, चूयफलाणं अकालोऽयं
॥ १६३०॥ १. अणक्खो - रोषः, २. दुकुहा - अरुचयः, ३. पहि - प्रधीः
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |