Page Text
________________
विण्णायमऽविण्णायं, अवराहपयं परस्स निस्सेसं । सुविसुद्धतिगरणऽप्पा, खमामि सम्म खु एस अहं
॥ ५५०४॥ जाणतो अजाणतो व, खमउ मा वा परो खमउ मज्झं। तहवि अहं निस्सल्लो, तिविहेण खमामि चेव सयं
॥५५०५ ॥ जइ ता परो वि खमई, ता लट्ठे होइ उभयवग्गे वि। अह गाढाऽणुसयपरो, परो न खमिउं तरइ तह वि
॥ ५५०६॥ मुक्काऽहंकारपओ, पवियंभियपसमपयरिसाऽऽरूढो। सुविसुद्धतिगरणगणो, सामाइयपरिणयऽप्पा य
॥५५०७॥ अक्खमणपरे वि परे, सम्मं तक्खमणकारणपरो हं। एस खमामि खलु सयं, जमेस मह खामणाकालो ॥ ५५०८॥ खामेमि अहं सव्वे, जीवे ते वि य खमंतु मह सव्वे । उवरयवइरो मेत्ती-परो अहं सव्वजीवेसु
॥५५०९॥ एवं खामेमाणो, सयं पि खमणापरो विसुद्धमणो। सिरिचंडरुद्दसूरि व्व, तक्खणा कुणइ कम्मखयं
॥ ५५१०॥ तहाहिउज्जेणीनयरीए, गीयत्थो अवज्जवज्जणुज्जुत्तो। सूरी अहेसि नामेण, विस्सओ चंडरुद्दो त्ति
॥५५११॥ पयईए च्चिय सो पुण पयंडकोवत्तणेण मुणिमज्झे । ठाउं सयमऽतरतो, साहुविवित्ताए वसहीए
॥५५१२॥ सज्झायज्झाणपरो, जत्तेणं पसमभावणाए दढं। अप्पाणं भावेतो, विहरइ गच्छस्स निस्साए
॥ ५५१३॥ अह एगम्मि अवसरे, केलिप्पियपियवयस्सपरिगरिओ। एगो महिब्भपुत्तो, नवपरिणीओ कयविभूसो
॥ ५५१४ ॥ वियरंतो तियचच्चर-चउप्पहाऽऽईसु तेसि साहूणं । परिहासकयपणामो, आसीणो पायदेसम्मि
॥५५१५॥ तो तस्स वयस्सेहिं, परिहासेणं पयंपियं भंते ! । एसो अम्ह वयस्सो, भववासाओ समुव्विग्गो
॥५५१६॥ इच्छइ घेत्तुं दिक्खं, एतो च्चिय विहियपवरसिंगारो। इहई समागओ ता, पव्वज्जमिमस्स देह त्ति
॥५५१७॥ आगारिंगियकुसला, मुणिणो य मुणित्तु तेसि परिहासं । अमुणेता इव ठिया निय-कज्जाइं काउमाऽऽढत्ता ।। ५५१८॥ भुज्जो भुज्जो सुइर-प्पलाविणो जाव नेव विरमंति । दुस्सिक्खिया हु सिक्खंतु, ताव इइ चिंतयंतेहिं
॥ ५५१९॥ साहूहि विवित्तपएस-संठिओ चंडरुद्दमुणिनाहो । अम्हाण गुरू एसो, दाही दिक्खं ति निद्दिट्ठो
॥ ५५२०॥ केलीकिलत्तणेणं, तत्तो ते सूरिणो गया पासे । पुव्वठिईए य सिट्ठा य, इब्भसुयदिक्खगहणिच्छा
॥ ५५२१ ॥ अहह ! मए वि हु सद्धि, केलि कुव्वंति कह महापावा । इइ चित्तऽब्भंतरजाय-तिव्वकोवेण तो तेणं
॥ ५५२२ ॥ भणियं जइ एवमऽहो, ता मह भूई लहुं समप्पेह । उवणीया य लहुं चिय कत्तो वि य से वयंसेहिं
॥ ५५२३॥ तो इब्भसुयं निबिड-ग्गहेण घेत्तूण तं सहत्थेण । उच्चरियनमोक्कारो, सूरी तुंचेउमाऽऽरद्धो
॥५५२४॥ भवियव्वयावसेण य, जाव वयस्सा न किंपि जपंति। न य इब्भसुओ ता तेण, सीसलोओ विणिम्मविओ ॥५५२५॥ तो भणियमिब्भपुत्तेण, भयवमाऽऽसी य एत्तियं कालं। परिहासो संपइ पुण, सब्भावो ता कुण पसायं ॥ ५५२६॥ वियरेसु भावसारं, संसारसमुद्दतरणतरकंडं। दिण्णसिवनयरसोक्खं, जयगुरुजिणदेसियं दिक्खं
॥५५२७॥ एवं वुत्ते दिण्णा, पव्वज्जा तस्स तेण मुणिवइणा । वेलक्खयं उवगया, गया सठाणेसु य वयंसा
॥ ५५२८॥ तेणं भणियं भंते !, बहुसयणो नो लहिस्समऽहमेत्थ । धम्म काउमऽविग्धं, ता जामो अण्णगामम्मि ॥ ५५२९॥ एवं होउ त्तिऽणुमण्णि-ऊण सो पेसिओ तओ गुरुणा । मग्गपडिलेहणऽत्थं, पडिलेहिय आगए तम्मि ॥ ५५३०॥ सणियं कयपयखेवो, वेवंतो सो जराए मुणिनाहो। तक्खंधनिहियदक्खिण-करो य गंतुं समाऽऽढत्तो
॥ ५५३१ ॥ थेवपयक्खलणे वि हु, पहम्मि रयणीए चक्खुबलवियलो। जायपकोवो बाढं, निब्भच्छइ सिक्खगं भुज्जो ॥ ५५३२॥ ताडेइ दंडएण य, सिरम्मि एवंविहो पहो तुमए। पडिलेहिओ त्ति पुणरुत्त-मेव परुसं पयंपंतो
॥५५३३॥ अह सिक्खगो वि चिंतइ, अहो महापावभायणेण मए । एस महप्पा एरिस-किलेसजलहिम्मि पक्खित्तो ॥५५३४ ॥ अहमेक्को च्चिय एयस्स, धम्मरासिस्स सिस्सछउमेणं । जाओ म्हि पच्चणीओ, धिद्धी ! दुव्विलसियं मज्झ ॥५५३५ ॥ इय अप्पाणं निदंतयस्स, सा का वि भावणा जाया। पाउब्भूओ जीए, से विमलो केवलाऽऽलोओ
॥५५३६ ॥ तो सो निम्मलकेवल-पईवपायडियतिहुयणाऽऽभोगो। गंतुं तहा पयट्टो, पयखलणा जह न से हवइ
॥ ५५३७॥ अह जायम्मि पभाए, दंडपहारुत्थरुहिरउल्लसिरं । दट्टण सिक्खगं चंड-रुद्दसूरी विचितेइ
॥ ५५३८॥ पढमदिणदिक्खियस्स वि, अहो ! खमा सिक्खगस्स एवविहा । एवंविहमाऽऽयरियं, मह पुण चिरदिक्खियस्साऽवि ५५३९ ।। धी! धी! ममं विवेओ, धिद्धी! सुयसंपया ममं विहला। धी! धी! मम सूरितं, खमागुणेणं विहीणस्स ॥५५४०॥
૧૫o.
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |