Page Text
________________
धम्मकहं चिय न कहेइ, केवलं किंतु तस्स भयहेडं। सुहमस्साऽवि अवाए, इय दंसइ गिद्धिसल्लस्स
॥ ५४३०॥ हिमवंतमलयमंदर-दीवोदहिधरणिसरिसरासीतो। अहिययरो आहारो, छुहिएणाऽऽहारिओ होज्जा
॥ ५४३१ ॥ संसारचक्कवाले, सव्वे वि य पोग्गला तुमे बहुसो। आहारिया य परिणा-मिया न तुमं तह वि तित्तो
॥५४३२॥ आहारनिमित्ता गंतुं, मंखु सव्वेसु नरयलोएसु । उववण्णो अइबहुसो, सव्वासु य मेच्छजातीसु
॥ ५४३३॥ आहारनिमित्तागं, मच्छा गच्छंत ऽणुत्तरं नरयं । सव्वं आहारविहि, ता मा मणसा वि चिंतेज्जा
॥ ५४३४॥ तणकटेहिं व अग्गी, लवणजलो वा नईसहस्सेहिं । न इमो जीवो सक्को, तिप्पेउं भोयणविहीहिं
॥ ५४३५ ॥ जं किर जलं पि पीयं, घम्माऽऽयवजगडिएण तं पि इहं । सव्वेसु वि अगडतलाय-नईसमुद्देसु वि न होज्जा ॥५४३६ ॥ पीयं थणयच्छीरं, सागरसलिलाउ होज्ज अहिययरं । संसारम्मि अणंते, माऊणं अण्णमऽण्णाणं
॥ ५४३७॥ घयखीरुच्छुरसेसु य, साऊसु महोयहीसु बहुसो वि। उववण्णो न य तण्हा, छिण्णा ते सीयलजलेण ॥ ५४३८॥ जइ ता न गतो तित्ति, अणंतएण वि अईयकालेण । ता किमियाणि वि एवं, ठियस्स तुह एत्थ गिद्धीए ॥५४३९ ॥ जह जह कीरइ गिद्धी, अवगासो तह तहा अविरईए। जह जह य तदऽवगासो, तप्पच्चइओ तह तहेह
॥ ५४४०॥ जीवाण कम्मबंधो, तओ भवो दुहपरंपरा य तहिं । इय सयलाऽवायाणं, रसगिद्धी कारणं तम्हा
॥ ५४४१ ॥ नीसेसकिलेसाऽऽयास-गरुयमाणाऽवमाणमूलपयं । संसारियसत्ताणं, विद्धि एसा हु रसगिद्धी
॥ ५४४२॥ एवं स महासत्तो, सम्मं आराहणाविहिपसत्तो । नाणाऽऽइगुणगुरुणा, गुरुणा दियदीहदुहतरुणा
॥ ५४४३॥ निउणमुवदंसिएसुं. विविहाऽवाएसु गिद्धिसल्लस्स। भवभमणदुक्खभीओ, संविग्गो चयइ रसगिद्धि
॥ ५४४४॥ अह कोवि कम्मदोसा, न चएज्जा तं भणिज्जमाणो वि । ता तप्पयईए हियं, वियरिज्जइ भोज्जमऽणवज्जं ॥ ५४४५ ॥ तदऽसंपत्तीए पुण, मग्गिज्जइ तह अलब्भमाणं च । कीयाऽऽइपयारेण वि, दावेयव्वं समाहिकए
॥५४४६॥ नवरं गुरुणा मुणिणो, सिक्खवियव्वा रहम्मि एयपुरो । वत्तव्वं तुब्भेहिं, "पाउग्गं एत्थ दुलहं ति"
॥५४४७॥ ते य तहा पण्णविया, तहेव जंपंति खवगमुणिपुरओ। किच्छेण थोयथोयं, अणुदियहं देंति य सखेया ॥५४४८ ॥ उचियसमयम्मि य गुरू, सासइ भो खवग! पेच्छ तुज्झ कए। मुणिणो दुल्लहअसणाऽऽइ-जायणे कह किलिस्संति ५४४९ ।। अह जायपच्छयावो, खवगो एक्केक्ककवलचागेण । पइदियहं हावेंतो, ठवेइ पोराणमाऽऽहारं
॥ ५४५०॥ अणुपुव्वेण य तं पि हु, संवèतो वि सव्वमाऽहारं । पाणगपरिकम्मेणं, खवगो भावेइ अप्पाणं
॥ ५४५१॥ इय कुमयकमलहिमभर-समाए संवेगरंगसालाए । संविग्गमणोमहुयर-कुसुमियवणराइतुल्लाए
॥ ५४५२॥ आराहणाए पडिदार-नवगमइए ममत्तवोच्छेए । तइए दारे भणियं, छटुं हाणि त्ति पडिदारं
॥ ५४५३॥ अह पाणगपरिकम्मण-पुरस्सरं जह स कुणइ संवरणं । तह पच्चखाणदारं, लेसुद्देसेण साहेमि
॥ ५४५४॥ अच्छं बहलं लेवड-मऽलेवडं तह ससित्थयमऽसित्थं । छव्विहपाणगमेयं, भणियं परिकम्मपाओग्गं
॥ ५४५५ ॥ तं पुण तिलजवगोहूम-पमुहधण्णाण धोयणुप्पण्णं । गुडखंडभंडधोयण-संभूयं अंबिलाऽऽईयं
॥ ५४५६॥ एयपयारं अवरं पि, सपरसत्थेहिं जायविद्धंसं । नवकोडिपरिसुद्धं, मुहियाए जणाउ उवलद्धं
॥ ५४५७॥ साहूण होइ जोग्गं, जहोवलद्धेण तेण खवगमुणी। परिकम्मेज्जऽप्पाणं, समाहिहेउं सया णवरं
॥ ५४५८॥ आयंबिलेण सिंभो, खिज्जइ पित्तं च उवसमं जाइ । वायस्स रक्खणट्ठा, पुव्वुवइटुं विहिं कुज्जा
॥ ५४५९॥ तित्ताई पाणयाई, वज्जित्ता उदरमलविसुद्धिकए। महुरं पेज्जेयव्वो, मंदं च विरेयणं खवगो
॥५४६०॥ एलतयनागकेसर-तमालपत्तं ससक्करं दुद्धं । पाऊण कढियसीयल-समाहिपाणं इमं पच्छा
॥ ५४६१ ॥ महुरविरेयणमेसो, कायव्वो फोफलाऽऽइदव्वेहिं । निव्वाविओदरऽग्गी, जेण समाहिं सुहं लहइ
॥ ५४६२॥ आणाइ बत्थिमाऽऽईहिं, वा वि कायव्वमुदरसोहणयं । वेयणमुप्पाएज्जा, करीसमऽच्छंतयं उदरे
।। ५४६३ ॥ तो जाजीवं तिविहं, आहारं वोसिरेहिइ खवगो। इइ निज्जवगाऽऽयरिओ, संघस्स इमं भणावेइ
॥ ५४६३ ॥ एस महप्पा खवगो, जाजीवियमऽणसणं गहेउमणो। सिरि रइयपाणिपउमो, तुब्भं पयवंदणं कुणइ
॥ ५४६५॥ विण्णवइ य तह कहमऽवि, सपसाएणं ममं भवेयव्वं । भयवं! तुमए जह वंछियऽत्थनित्थारगो होमि
॥ ५४६६ ॥ १. दिय = दित - छेदित, २. पज्जेयव्वो - पायितव्यः,
૧૫૫
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |