Page Text
________________
पत्तो य तावसाऽऽसम-समीवदेसम्मि कहवि तुडिजोगा। इयरसुगेणं दट्टण, महुरवाणीए तो भणियं ॥५२४८॥ हंहो तावसमुणिणो !, तुरंगहरिओ नराऽहिवो एसो। एइ चउराऽऽसमगुरू, ता कुणह इमस्स पडिवत्ति ॥५२४९॥ तव्वयणेण य सव्वाऽऽ-यरेण निययाऽऽसमम्मि नरनाहो । नेऊण तावसेहि, उवयरिओ भोयणाऽऽईहिं ॥५२५०॥ अह वीसत्थसरीरो, विम्हइयमणो निवो सुगं भणइ । तुल्लम्मि वि तिरियत्ते, विसरिससीलत्तणं किं भे
॥ ५२५१॥ जेणं स भिल्लपल्ली-सुगो तहा निट्ठरं पयंपेइ । तुममऽवि एवं मंजुल-गिराए उल्लवसि हियमेव
॥५२५२॥ ताहे सुगेण सिटुं, एगा जणणी पिया वि एक्को य । मम तस्स य नवरं सो, नीओ पल्लीए भिल्लेहि
॥५२५३ ॥ अहमऽवि मुणीहि नियनिय-संसग्गसमुब्भवा य गुणदोसा। संजाया अम्हाणं, पयडं तुमए वि दिट्ठमिमं ॥५२५४॥ एवं जइ तिरियाण वि, संसग्गिवसेण दोसगुणसिद्धी। लोयम्मि वि सुपसिद्धा, ता न कहं तवेण किसियस्स दुरऽणुचरमुत्तिमटुं, पसाहिउं उज्जयस्स खवगस्स । दुट्ठजणपाडिवेसेण, होज्ज सज्झाणविग्घाऽऽई
॥५२५६ ॥ सुट्ठ वि समी वि सुट्ठ वि, दमी वि सुट्ठ वि पणट्ठमाणो वि। किं चोज्जं कलुसिज्जइ, कुसीलजणसण्णिहाणेण ॥५२५७ ॥ कलहो बोलो झंझा, वामोहो संकरो ममत्तं च । झाणऽज्झयणविघाओ, नऽस्थि विवित्ताए वसहीए - ।। ५२५८॥ तम्हा मणखोहकरो, पंचिंदियगोयरो जहिं णऽत्थि। चिट्ठउ तत्थ तिगुत्तो, खवगो सुहझाणसंजुत्तो
॥५२५९॥ उग्गमउप्पायणएसणाहिं, सुद्धाए अपरिकम्माए । वसईइ असंसत्ताए, निप्पाहुडियाए सेज्जाए
॥५२६०॥ घणकुड्डे सकवाडे, गामबहिं बालवुड्डाणजोगे। उज्जाणघरे ठायइ, सेलगुहाए य सुण्णघरे
॥ ५२६१॥ दो तिण्णि य वसहीओ, लेज्जा सुहनिग्गमप्पवेसाओ। कडचिलिमिणिजुत्ताओ, धम्मकहामंडवजुयाओ ॥ ५२६२॥ एगत्थ ठवे खवगं, गच्छट्ठियसाहुणो य अण्णत्थ । मा होज्ज भोयणरुई, खवगस्साऽऽहारगंधेण
॥ ५२६३ ॥ पाणाऽऽईणि वि तहियं, ठवेज्ज जम्मि निएज्ज नो खवगो । न य अपरिणया मुणिणो, कम्हा नणु भण्णइ निमित्तं ॥ ५२६४ ॥ असमाहियस्स खवगस्स, कहवि मा पेच्छिऊण दिज्जंतं । असणाऽऽई मुद्धाणं, तदुवरि अप्पच्चओ होज्जा ॥५२६५ ॥ चिरभवपरंपरापरि-चियत्तणेणाऽवि कहवि मा गिद्धी। पाउब्भवेज्ज सहसा, खवगस्स महाऽणुभावस्स ॥५२६६॥ आराहणामहोयहि-तडपत्तस्साऽवि खवगपोयस्स । आवडइ कहवि विग्घो वि, जेण तेणेस जत्तो त्ति ॥५२६७॥ इय धम्मसत्थमत्थयमणीए, संवेगरंगसालाए । संविग्गमणोमहुयर-कुसुमियवणराइतुल्लाए
।। ५२६८॥ आराहणाए पडिदार-नवगमइए ममत्तवोच्छेए । तइए दारे बीयं, भणियं सेज्ज त्ति पडिदारं
॥ ५२६९॥ सेज्जाए जहुत्ताए वि, होज्ज संथारगं विणा न रई। आराहगस्स तम्हा, तद्दारमियाणि कित्तेमि
॥५२७०॥ पुव्वं पवंचियाए, सेज्जाए जत्थ किर पएसम्मि। मूसगरयउक्केरस्स, नत्थि थेवं पि उद्दवणं
॥५२७१॥ ऊसतुसाराऽऽईणं, न विणासो न य पईवविज्जूणं । न य पबलप्पवणाणं, पाईणपडीणपभिईणं
॥ ५२७२॥ न य संघट्टो बीयाण, सालिपमुहाण नेव हरियाण । नोवद्दवणं पि पिपीलि-याऽऽइयाणं तसजियाणं
॥ ५२७३॥ अमणुण्णदव्वगंधा-ऽऽइणो य असमाहिकारिणो न जहिं । तत्थ घसभिलुगरहिए, हियए खवगस्स पयईए ॥५२७४॥ पुढवीसिलामओ वा, फलहमओ तणमओ य संथारो । कीरइ समाहिहेउं उत्तरसिर अहव पुव्वमुहो
॥५२७५ ॥ तत्थ य फासुयदेसे, समे अझुसिरे य भूमिसंथारो । अप्फुडियअसंसत्तो, समपट्ठिसिलामओ होइ
॥ ५२७६ ॥ निच्छिडगनिकंपो, लहुओ एगंऽगिओ य फलहमओ। निस्संधी अप्पोल्लो, तणसंथारो भवति मउओ ॥५२७७॥ एसो पुण संथारो, उभओकालपडिलेहणासुद्धो। जुत्तपमाणविरइओ, आरुहियव्वो तिगुत्तेण
॥ ५२७८॥ निस्संगयाए लिंग, भणिया एए वि दव्वसंथारा । मुणिणो भावसमाहीए, कारणत्तेण अह तत्थ
॥ ५२७९॥ संलीणयाठियऽप्पो, संवेगगुणऽण्णिओ य तक्कालं । संथारम्मि निसण्णो, विहरइ संलेहओ धीरो
॥५२८०॥ अह दढकढिणत्तणओ, तणसंथाराऽऽइएसु खवगस्स। चिट्ठिउमऽपारयंतस्स, होज्ज जइ कह वि असमाही ॥ ५२८१॥ ता तत्थ पत्थरिज्जंति, एगदुगमाऽऽइया वि से (कंथा) कप्पा। अववाएणं ता जा, पावारगतूलिमाऽऽई वि ॥५२८२॥ एवमऽणेगपयारो, वुत्तो दव्वं पडुच्च संथारो । तं चिय अणेगभेयं, जाणसु भावं पुण पडुच्च
॥५२८३॥ रागं दोसं मोहं, कसायजालं च दूरमुझिंतो। संपत्तपरमपसमो, आय च्चिय होइ संथारो
॥ ५२८४॥ १. अप्पोल्लो - शुषिरहितः,
૧૫૦
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |